भिवंडीत इमारतीच्या छताचा प्लास्टर कोसळले

भिवंडीत इमारतीच्या छताचे प्लास्टर कोसळले
दोन महिलांसह एक मुलगा जखमी
भिवंडी, ता. ९ (वार्ताहर) : पिरानी पाडा परिसरात धोकादायक अवस्थेतील इमारतीच्या छताचे प्लास्टर कोसळल्याची घटना बुधवारी (ता. ९) घडली. यामध्ये दोन महिलांसह एक मुलगा गंभीर जखमी झाला आहे. जखमींना तत्काळ उपचारासाठी शासकीय उपजिल्हा रुग्णालयात दाखल करण्यात आले आहे. समद हरून अन्सारी (वय १०), मरियम मिरजुद्दीन गोसे (२७) व शारीना परवीन (२९) अशी जखमींची नावे आहेत.

शहारातील प्रभाग समिती क्रमांक दोनमधील पिराणी पाडा येथील बिहारी चाळ घर क्रमांक ३९०/१ ही एकमजली जीर्ण अवस्थेतील इमारतीमधील एका घरातील छताच्या स्लॅबचे प्लास्टर बुधवारी सकाळच्या सुमारास कोसळले. यामध्ये घरातील दोन महिला व एक मुलगा जखमी झाला आहे. घटनेची माहिती मिळताच शांतीनगर पोलिस व पालिका कर्मचाऱ्यांनी घटनास्थळी धाव घेतली. या सर्व जखमींना तत्काळ दिवंगत इंदिरा गांधी रुग्णालयात उपचारासाठी दाखल करण्यात आले आहे. यामध्ये समद व मरियम या दोघांना पुढील उपचारासाठी ठाणे जिल्हा रुग्णालयात हलविण्यात आले. दरम्यान, या इमारतीचा विद्युत पुरवठा व पाणीपुरवठा खंडित करण्यात आला असून इतर कुटुंबीयांना ही इमारत रिकामी करण्यास सुरुवात केल्याची माहिती सहाय्यक आयुक्त माणिक जाधव यांनी दिली.