मनसेच्या महिला पदाधिकाऱ्याला धमकी

मनसेच्या महिला पदाधिकाऱ्याला धमकी
बदलापूर, ता. ९ (बातमीदार) : मराठीचा मुद्दा तापला असताना अमराठी भाषिकांना राग अनावर झाल्याने मनसे महिला पदाधिकाऱ्यांना धमक्या येऊ लागल्या आहेत. बदलापुरातील मनसेच्या महिला शहराध्यक्ष संगीता चेंदवणकर यांना एका अमराठी व्यक्तीने समाजमाध्यमातून जीवे ठार मारण्याची धमकी दिल्‍याचा प्रकार समोर आला आहे.

राज्यात सुरू असलेल्या मराठीच्या मुद्द्यावरून राजकारण तापले आहे. त्यातच या मुद्द्यावर मनसेने आग्रही भूमिका घेतली असून, त्यामुळे मनसेच्या पदाधिकाऱ्यांना आता धमक्या दिल्या जात असल्‍याचे समोर आले आहे. शहरातील मनसेच्या महिला शहराध्यक्ष संगीता चेंदवणकर यांना सोशल मीडियाच्या माध्यमातून एका अज्ञात व्यक्तीने जीवे ठार मारण्याची धमकी दिली आहे. याप्रकरणी चेंदवणकर यांनी सुरुवातीला बदलापूर पश्चिम पोलिस ठाण्यात आणि त्यानंतर पोलिस आयुक्तांची भेट घेत, यासंबंधी तक्रार केली आहे. दरम्यान, ‘मराठीसाठी आम्ही कोणत्याही धमक्यांना भीक घालणार नाही,’ अशी भूमिका चेंदवणकर यांनी घेतली आहे.