मधुकर पांडे यांची तडकाफडकी बदली

मधुकर पांडे यांची तडकाफडकी बदली
मोर्चाला परवानगी नाकारणे भोवले?

भाईंदर, ता. ९ (बातमीदार): मिरा-भाईंदर-वसई-विरारचे पोलिस आयुक्त मधुकर पांडे यांची तडकाफडकी बदली करण्यात आली आहे. मिरा रोड येथे मंगळवारी (ता. ८) झालेल्या मराठी मोर्चाला परवानगी नाकारणे त्यांना भोवले असल्याचे मानले जात आहे.
मराठी अस्मितेसाठी मनसे व मराठी एकीकरण समितीकडून मंगळवारी मोर्चा काढण्याचे जाहीर करण्यात आले होते; मात्र पोलिसांनी परवानगी नाकारली होती. मोर्चाला परवानगी नसल्याने पोलिसांनी नेत्यांची तसेच आंदोलकांची धरपकडदेखील केली. यावरून आंदोलकांमध्ये संतापाचे वातावरण निर्माण झाले. पोलिसांकडून दडपशाही सुरू असल्याचा आरोप या वेळी करण्यात आला. पोलिसांच्या विरोधाला न जुमानता आंदोलकांनी मोर्चा काढला. सुमारे चार तास मिरा रोडमधील वातावरण या कारणावरून तणावपूर्ण झाले होते. मोर्चाला परवानगी दिली असती, तर मोर्चा शांततेत निघून आंदोलन वेळेत समाप्तही झाले असते, असे आंदोलकांचे म्हणणे होते. याचे पडसाद विधिमंडळ अधिवेशनातही उमटले. खुद्द मुख्यमंत्री देवेंद्र फडणवीस यांनी पोलिसांनी मोर्चाला परवानगी न दिल्याबद्दल नाराजी व्यक्त केली. या सर्वाचा परिणाम म्हणून पोलिस आयुक्त मधुकर पांडे यांची उचलबांगडी झाल्याचे मानले जात आहे. दरम्यान, आता निकेत कौशिक यांची आयुक्तपदी नियुक्ती करण्यात आली आहे. ते लाचलुचपत प्रतिबंधक विभागाचे अपर पोलिस महासंचालक म्हणून कार्यरत होते. मधुकर पांडे यांची अपर पोलिस महासंचालकपदी (प्रशासन) बदली झाली आहे.