अतिसारामुळे तीन वर्षाच्या मुलाचा मृत्यू

अतिसारामुळे तीन वर्षांच्या मुलाचा मृत्यू
खालापुरात दहा जणांवर उपचार सुरू

खालापूर, ता. ९ (बातमीदार) : तालुक्यातील इसांबेवाडीत अतिसाराच्या साथीने सोहम तुकाराम वाघमारे या तीन वर्षांच्या मुलाचा मृत्यू झाला असून लागण झालेले जवळपास दहा जण वेगवेगळ्या रुग्णालयांत उपचार घेत आहेत. सावरोली खारपाडा मार्गावर २८८ लोकसंख्येची इसांबेवाडी आहे. येथे राहणाऱ्या सोहमला रविवारी (ता. ६) उलट्या व अतिसार सुरू झाले. सोहमचे कुटंबीय रविवारी आसरेवाडी येथे वस्तीला गेले होते. तेथून रुग्णालयात जाण्यापूर्वीच सोहमचा मृत्यू झाला. सोहमच्या मृत्यूनंतर अतिसाराचे जवळपास सहा रुग्ण लोहप प्राथमिक आरोग्य केंद्रात उपचारासाठी दाखल झाले. यामध्ये चार महिला व दोन पुरुषांचा समावेश आहे. अतिसराची साथ असल्याचे लक्षात आल्यानंतर सतर्क झालेल्या आरोग्य यंत्रणेने इसांबे आदिवासी वाडीत घरोघरी तपासणी मोहीम सुरू केली आहे. अतिसाराची लागण झालेले दोन रुग्ण भिवपुरी तर दोन रुग्ण पेण येथील रुग्णालयात असल्याचीदेखील माहिती मिळाली आहे. दरम्यान, इसांबेवाडीची पेयजल योजना पाताळगंगा नदीवरून आहे. नदीतून थेट पाणी उचलले जात असून वाडीमध्ये खासगी विकसकाकडून जलशुद्धीकरण यंत्रणा बसवण्यात आली आहे. आरोग्य विभागाने जलशुद्धीकरण यंत्रणा साफसफाई व सूचना दिल्या असून पाण्याचे नमुने तपासणीकरिता पाठवले आहेत.

लोहप प्राथमिक आरोग्य केंद्रात उपचार घेत असलेल्या सर्व रुग्णांची प्रकृती स्थिर आहे. सर्वजण घरी सोडण्यात येणार होते; परंतु अधिक तपासणी करता रुग्णाची विष्ठा जे. जे. रुग्णालयात पाठविण्यात आली आहे. तपासणी अहवाल आल्यानंतर सर्व रुग्णांना घरी सोडण्यात येईल. इसांबे वाडीतील जलशुद्धीकरण यंत्रणेचीदेखील पूर्णपणे तपासणी करण्यात येत असून पाण्याचे नमुने तपासणीकरिता पाठवले आहेत.
- डाॅ. मंगेश देशमुख, वैद्यकीय अधिकारी, प्राथमिक आरोग्य केंद्र, लोहप