विलेपार्ल्यातील जैन मंदिरावरील कारवाई योग्यच

जैन मंदिरावरील कारवाई योग्यच!
उच्च न्यायालयाने ट्रस्टचे अपील फेटाळले
सकाळ वृत्तसेवा
मुंबई, ता. ९ ः विलेपार्ले येथील जैन मंदिरावरील मुंबई महापालिकेने केलेली पाडकामाची कारवाई योग्य असल्याचे बुधवारी (ता. ९) उच्च न्यायालयाने स्पष्ट केले. मंदिरावरील पाडकाम कारवाईचे आदेश देणाऱ्या शहर दिवाणी न्यायालयाच्या आदेशाविरुद्ध ट्रस्टने दाखल केलेले अपील फेटाळून लावले. तसेच  महापालिकेने केलेली कारवाई योग्य ठरवली. तसेच मंदिराच्या जागी ठेवलेला राडारोडा उचलण्याचे आणि त्यासाठी येणारा खर्च वसूल करण्याचे आदेशही न्यायालयाने या वेळी महापालिकेला दिले. 
विलेपार्ले येथील ९० वर्षे जुने पार्श्वनाथ दिगंबर जैन मंदिरावर न्यायालयाच्या आदेशानंतर महापालिकेने पाडकाम कारवाई केली होती. या कारवाईत मंदिराचा बहुतांश भाग पाडण्यात आला. तथापि, ट्रस्टने उच्च न्यायालयात धाव घेऊन पाडकाम रोखण्याची मागणी केली होती. याचिकेची दखल घेऊन मंदिराच्या उर्वरित बांधकामावर पुढील आदेशापर्यंत कारवाई करण्यास न्यायालयाने ‘जैसे थे’चे आदेश दिले होते. न्या. गौरी गोडसे यांच्या एकलपीठाने बुधवारी ट्रस्टचे अपील फेटाळत असल्याचे स्पष्ट केले. त्यानंतर मंदिराची जागा जैसे थे ठेवण्याच्या आदेशाला चार आठवड्यांची मुदतवाढ देण्याची ट्रस्टची विनंती मान्य केली. 
----