शौचालय बंद असल्‍याने प्रवाशांची कुचंबणा

शौचालय बंद असल्‍याने प्रवाशांची कुचंबणा
दीड वर्षानंतरही दिघा गाव रेल्‍वेस्‍थानकात सुविधांची वानवा

वाशी, ता. १० (बातमीदार) ः ट्रान्स हार्बर मार्गावर ऐरोली व ठाणे रेल्वेस्थानकांदरम्‍यान असलेल्‍या दिघागाव रेल्वेस्थानकांचे उद्‌घाटन दीड वर्षांपूर्वी पंतप्रधान नरेंद्र मोदी यांच्या हस्ते करण्यात आले. हे स्थानक मुंबई रेल्‍वे विकास कॉर्पोरेशनकडून बांधण्यात आले आहे, मात्र अद्याप पूर्णपणे सुविधा उपलब्‍ध झालेल्‍या नाहीत. येथील सरकते जिने व उद्वाहक बहुतांश वेळा बंद असल्‍याने प्रवाशांची विशेषतः ज्‍येष्‍ठ नागरिकांची गैरसोय होते, तर शौचालयालाही कायम कुलूप असते.
स्‍थानकात मनुष्‍यबळाचा अभाव असून, मध्य रेल्‍वे प्रशासनाकडून तात्पुरत्या स्वरूपात कर्मचाऱ्यांची नियुक्ती केली आहे. प्रवाशांच्या तुलनेत मनुष्‍यबळ कमी असल्‍याने कार्यरत असलेल्‍या कर्मचाऱ्यांवर ताण पडतो. ट्रान्स हार्बर मार्गावरील वाशी ते ठाणे रेल्वेस्थानकादरम्यान असणारे वाशी, तुर्भे, सानपाडा, ऐरोली, रबाळे, घणसोली ही रेल्वेस्थानके सिडकोने बांधली असून, त्यांची देखभालही सिडकोकडून करण्यात येत आहे, पण दिघा गाव स्थानक रेल्वे विकास मंडळाकडून बांधण्यात आले आहे. या ठिकाणी वाहनतळाचा प्रश्‍न गंभीर आहे.
रेल्वेस्थानकाला फेरीवाले व रिक्षाचालकांचा विळखा असल्यामुळे सकाळ-संध्याकाळच्या वेळी वाहतूक कोंडीची समस्या उद्‌भवते. दिघा गाव रेल्वेस्थानकात शौचालय बांधण्यात आले आहे, मात्र ते नेहमीच बंद असल्‍याने महिलांची कुचंबणा होते. ट्रान्स हार्बर मार्गावरील दिघा गाव या पहिल्याच रेल्वेस्थानकात प्रवाशांसाठी सरकते जिने तसेच उद्वाहक यांची सोय करण्यात आली आहे, मात्र बऱ्याचदा ते बंद असतात. रेल्वेस्थानकाच्या दोन्ही बाजूस तिकीट खिडकी असली तरी एकाच बाजूची खिडकी सुरू असते. त्‍यामुळे घाईच्या वेळी प्रवाशांना धावपळ करावी लागते. याबाबत दिघा गाव रेल्वेस्‍थानक प्रबंधक दीपक पवार यांच्याकडे विचारणा केली असता, स्थानकात नियमित स्वच्छता केली जाते, मात्र मनुष्‍यबळाअभावी उत्तरेकडील तिकीट खिडकी बंद असल्‍याचे त्‍यांनी सांगितले.

प्रतिदिन प्रवासी ः २५ ते ३० हजार
तिकीट विक्री ः ८ ते ९ हजार

दिघा गाव रेल्वेस्थानकाच्या बाहेर नेहमीच वाहनांची वर्दळ असते. स्थानकातील शौचालय कायम बंद असते. त्याचप्रमाणे सरकते जिने, उद्‌वाहकही बंद असल्याने वयोवृद्धांना त्रास होतो.
प्रशांत विराळे, प्रवासी