वेतन थकल्याने अडचणींचा डोंगर

पडघा, ता. १० (बातमीदार)ः भिवंडी तालुक्यातील दुर्गम भागात असलेल्या मोहंडुळ येथील नवोदय विद्यामंदिर व कनिष्ठ महाविद्यालयाच्या शिक्षकांचे वेतन थकल्याने विविध आर्थिक अडचणींना तोंड द्यावे लागत आहे. त्यामुळे आक्रमक झालेले कर्मचारी रजा आंदोलनाच्या तयारीत आहेत.
नवोदय विद्यामंदिर येथे मोहंडुळ परिसरातील खेडी, गाव, पाड्यांतील पाचवी ते बारावीपर्यंतचे ११२ विद्यार्थी शिक्षण घेत असून नऊ व १३ वर्षांपासून विद्यार्थ्यांना शिक्षण देण्याचे काम शिक्षक व शिक्षकेतर कर्मचारी काम करीत आहेत; मात्र संस्थाचालकांच्या दुर्लक्षामुळे वेतन थकल्याने शिक्षक तसेच शिक्षकेतर कर्मचाऱ्यांना विविध अडचणी येत आहेत. या प्रकरणात मोहंडुळ ग्रामपंचायतीचे माजी उपसरपंच शरद जाधव यांच्या मध्यस्थीनंतर थकलेले अर्धे वेतन देण्याचे शाळा संस्था व्यवस्थापनाने मान्य केले होते; मात्र त्यानंतर काहीच कार्यवाही झाली नसल्याने आंदोलनाचा इशारा दिला आहे.
----------------------------------------
१५ जुलैपासून सामुदायिक रजेवर
सात दिवसांत सकारात्मक कार्यवाही झाली नाही तर १५ जुलैपासून सामुदायिक रजेवर जाण्याचा निर्णय कर्मचाऱ्यांनी घेतला आहे. याबाबतचे निवेदन त्यांनी भिवंडी पंचायत समितीच्या शिक्षणाधिकाऱ्यांना दिले आहे. तसेच विद्यार्थ्यांच्या शैक्षणिक नुकसानीला शाळा व्यवस्थापन जबाबदार असणार आहे.