हृदयातून काढला लिंबाएवढा ट्यूमर

हृदयातून काढला लिंबाएवढा ट्यूमर
डॉक्टरांचा दावा; मुंबईतील पहिली दुर्मिळ शस्त्रक्रिया
सकाळ वृत्तसेवा
मुंबई, ता. १० : मुंबईतील ७४ वर्षीय वृद्धाच्या हृदयातून लिंबाच्या आकाराचा ट्यूमर काढण्यात आला. लेट अ‍ॅट्रियल मायक्सोमा नावाचा हा दुर्मिळ, कर्करोग नसलेला ट्यूमर डाव्या आलिंदामध्ये वाढला. यामुळे उजव्या कोरोनरी धमनीत ८५ ते ९० टक्के अडथळा निर्माण झाला होता. नानावटी रुग्णालयात मिनिमली इनव्हेसिव्ह कार्डियाक सर्जरीद्वारे ट्यूमर काढण्यात आला आणि एकाच वेळी कोरोनरी बायपासची प्रक्रियाही करण्यात आली.
मधुमेहाचा इतिहास लक्षात घेता उघड्या छातीची शस्त्रक्रिया धोकादायक होती. त्यामुळे कमी आक्रमक तंत्राचा वापर करण्यात आला. ही प्रक्रिया डॉ. चंद्रशेखर कुलकर्णी आणि डॉ. सिद्धार्थ सेठ यांच्या मार्गदर्शनाखाली पार पडली. या वेळी डॉ. सिद्धार्थ सेठ म्हणाले, “लेट अ‍ॅट्रियल मायक्सोमा हा अत्यंत दुर्मिळ ट्यूमर आहे. हृदयात अशा प्रकारचे ट्यूमर फारच कमी प्रमाणात आढळतात.” रुग्णाची प्रकृती सध्या स्थिर असून, मुंबईतली पहिली शस्त्रक्रिया असल्याचा दावा रुग्णालयाच्या डॉक्टरांनी केला आहे.