घाटकोपरच्या खंडोबा टेकडीवर अनेक झाडांची कत्तल

घाटकोपरच्या खंडोबा टेकडीवर अनेक झाडांची कत्तल
पर्यावरणप्रेमींमध्ये नाराजी; कारवाई करण्याची मागणी
घाटकोपर, ता. १० (बातमीदार) ः घाटकोपर आणि पवईच्या मध्यावर असलेल्या खंडोबा टेकडीच्या जंगलात जेसीबी लावून ३०० ते ४०० झाडांची कत्तल करण्यात आल्याची घटना समाेर आली आहे. एका प्रसिद्ध विकसकाने हा प्रकार केल्‍याचे बोलले जात आहे.
या वृक्षतोडीविरोधात निसर्गप्रेमींनी जोरदार रोष व्यक्त केला आहे. भाजप नेते, माजी खासदार किरीट सोमय्या यांनी बुधवारी (ता. ९) या ठिकाणी भेट देत पाहणी केली. या वेळी त्यांनी पोलिस आणि पालिकेच्या अधिकाऱ्यांना धारेवर धरले. तसेच पवई पोलिस ठाण्यात जाऊन तक्रार अर्जदेखील दाखल केला. या ठिकाणी विकसक, कंत्राटदार आणि पालिका अधिकाऱ्यांनी मिळून ही वृक्षतोड केली आहे, याबाबत हरित लवाद आणि पालिका आयुक्तांकडे तक्रार करणार असल्याचे त्यांनी सांगितले. हे जंगल सुरक्षित ठेवण्याची जबाबदारी आपली असल्याचे किरीट सोमय्या म्हणाले.
घाटकोपरमधील काही निसर्गप्रेमींनी तीन दिवसांपूर्वी खंडोबा टेकडी येथील ३००हून अधिक झाडांची कत्तल झाल्याचे व्हिडिओ आणि त्यांची माहिती पोलिसांच्या दृष्टीत आणून देत आंदोलनाचा इशारादेखील दिला होता. याची दखल घेत सोमय्या यांनी परिसराची पाहणी केली. यादरम्यान त्यांनी संबंधित पालिका अधिकारी आणि विकसक यांच्यावर कारवाई करण्याची मागणीदेखील केली.

रविवारी निषेध रॅली
उपनगरातील खंडोबा टेकडी येथील जंगलात डोंगर ग्रूप आणि निसर्ग वैभव फाउंडेशनकडून दर रविवारी वृक्षारोपण आणि त्यांचे संवर्धन अशी मोहीम राबवली जाते. आतापर्यंत निसर्गप्रेमींनी या डोंगरावर पाचशेहून विविध जातींची झाडे वाढवली आहेत. काही दिवसांपूर्वी प्रसिद्ध विकसकाकडून जेसीबी लावून झाडे तोडल्याचा प्रकार घडला. या प्रकाराचा येथील निसर्गप्रेमींकडून तीव्र विरोध करण्यात आला. रविवारी (ता. १३) सकाळी १० वाजता निषेध रॅली काढण्यात येणार असल्याचे निसर्गप्रेमींनी सांगितले.

जंगल सुरक्षित ठेवण्याची जबाबदारी आपली आहे. पालिका आणि संबंधित अधिकाऱ्यांवर कारवाई करण्याची मागणी केली आहे. हरित लवाद आणि पालिका आयुक्तांकडे याबाबत तक्रारदेखील करणार आहे.
- किरीट सोमय्या, माजी खासदार