धारावी परिसरात सजली राखीची दुकाने

धारावी परिसरात सजली राखीची दुकाने
रक्षाबंधनाची लगबग सुरू
धारावी, ता. १० (बातमीदार) : भाऊ-बहिणीचे नाते जगावेगळे असते. विश्वास, प्रेम, आपुलकी आदी सर्व गोष्टी या नात्यात असतात. बहीण मोठी असेल, तर ती आईची जागा भरून काढते. जर भाऊ मोठा असेल, तर त्याला वडिलांची जागा घ्यावी लागते. या नात्याला अधिक दृढ करणारा रक्षाबंधन हा सण महिन्यावर आल्‍याने बहिणींची लगबग सुरू झाली आहे. धारावी परिसरात रंगबेरंगी, आकर्षक राख्या विक्रीसाठी दुकानांमध्ये दाखल झाल्‍या आहेत.
धारावीतील केला वखार व संगम नगर येथील पटवा समाज अनेक वर्षांपासून राखी बनवण्याचा व्यवसाय करतो. वर्षाच्या सुरुवातीलाच राखी बनवण्यास सुरुवात होते. जसजसा सण जवळ येतो, तशी राखी बनवण्याला वेग येतो. लहान, थोर या कामात व्यस्‍त असतात. लाखो राख्यांची निर्मिती केली जाते. या बनवलेल्या राख्या देश-विदेशात जातात. तसेच धारावीत महात्मा गांधी रस्त्यावर राखीविक्रीची होलसेलची दुकाने थाटली जातात. या दुकानातून फक्त होलसेल विक्री केली जाते.
मुंबई, ठाणे, नवी मुंबई, पालघर आदी ठिकाणांहून राखीविक्रेते या ठिकाणी राखी खरेदीसाठी येतात. धारावीतील या राख्यांना मोठी मागणी असते. दरवर्षी मागणी असेल तशा राख्या बनवल्या जातात. यासाठी शेकडो कुटुंबे राबत असतात. पटवा समाजाच्या किमान मागील पाच पिढ्या या व्यवसायात गुंतल्‍या आहेत.

मागणी तसा पुरवठा
किमान दीड रुपयांपासून ते ८० रुपयांपर्यंत राखी विक्रीसाठी ठेवली आहे. मोठे व्यापारी व किरकोळ विक्रेते येथून होलसेल भावात राखी विक्रीसाठी घेऊन जातात, अशी माहिती येथील विक्रेत्‍यांनी दिली. मागणी तसा पुरवठा केला जातो, असे त्‍यांनी सांगितले.

रक्षाबंधन सण जसा जवळ येईल, तशी आम्‍हाला तयारी करायला लागते. आम्हाला रात्रंदिवस काम करावे लागते. तहान-भूक विसरून काम करावे लागते. गेल्‍या ४० वर्षांपासून मी माझ्या वडिलांसोबत या व्यवसायात आहे.
- प्रदीप पटवा, तरुण राखीविक्रेता