मेट्रो राहू दे, आम्हाला मूलभूत सुविधा द्या

मेट्रो राहू दे, आम्हाला मूलभूत सुविधा द्या
बदलापूर रेल्वेस्थानकात शौचालय नसल्याने महिला प्रवाशांची कुचंबणा!
बदलापूर, ता. १० (बातमीदार - मोहिनी जाधव) : कुठे त्या बुलेट आणि मेट्रो रेल्वेच्या गप्पा मारता, आम्हाला बदलापूर स्थानकात निदान चांगले शौचालय द्या, असे म्हणत बदलापूरच्या महिला रेल्वे प्रवाशांनी संताप व्यक्त केला आहे. स्थानकात एकमेव शौचालयाची अवस्था बकाल झाली आहे. पावसाळ्याच्या दिवसांत स्वच्छतागृह नसल्याने महिलांची मोठी गरैसोय होत आहे. त्यामुळे रेल्वेस्थानकात अद्ययावतीकरणाचे काम पूर्ण होईपर्यंत निदान ई-टॉयलेटची व्यवस्था करण्याची मागणी महिला प्रवाशांनी केली आहे.
-------------------------------
महिलांची ससेहोलपट
बदलापूर शहरातून रोज दीड लाख रेल्वे प्रवासी प्रवास करतात. त्यातही शहरातून रेल्वे प्रवासातील एकूण प्रवाशांपैकी ३० ते ३५ टक्के महिला प्रवासी लोकलने प्रवास करतात. ५० हजार महिला फलाट क्रमांक तीनवर जे एकमेव शौचालय आहे, फलाट क्रमांक एक आणि दोनवर शौचालय नसल्याने महिलांना दोन्ही फलाट चढून तिसऱ्या क्रमांकाच्या फलाटावर यावे लागते.
-------------------------
फलाटावरही दुर्गंधी
तीन नंबर फलाटावरील शौचालय कधी बंद, तर कधी चालू असते, त्यातही या ठिकाणी स्वच्छता नसल्याने दुर्गंधी आणि घाणीचेच स्वच्छतागृह वापरावे लागते, मात्र रेल्वे प्रशासन यासंदर्भात काहीच का उपाययोजना करत नाही, असा सवाल आता महिला प्रवासी उपस्थित करत आहेत.
--------------------------------
बाजारपेठेत गैरसोय
बदलापूर फलाट क्रमांक एकच्या बाहेर, पश्चिमेकडील मोठी बाजारपेठ आहे. या बाजारपेठेत ग्रामीण भागातील महिला व्यवसायासाठी बसतात. या बाजारपेठेत पालिकेकडून स्वच्छतागृहाची व्यवस्था करण्यात आली नाही. पालिकेने बाजारपेठेत ई-टॉयलेटची व्यवस्था केलेली आहे, मात्र हे ई-टॉयलेट ज्या ठिकाणी आहे, त्याच्या चारही बाजूला कचऱ्याचा आणि घाणीचा ढीग असतो. त्यात एकच ई-टॉयलेट असल्याने व पुरुषवर्ग याचा वापर करत असतो. त्यामुळे महिलांची मोठी गैरसोय निर्माण होतेय.
----------------------------
बुलेट, मेट्रोच्या गप्पा नको
बदलापूर शहरात विकासाच्या दृष्टीने मोठमोठ्या गप्पा मारल्या जातात. लोकलची वाढती गर्दी कमी करण्यासाठी, शहरात लवकरच मेट्रो सुरू होणार अशाही घोषणा होतात, मात्र मेट्रो सुरू करण्यापूर्वी त्या लोकल सेवेचा बोजवारा उडाला आहे. लोकलचा बराच महसूल बदलापूरकरांकडून जमा होतो, तर आम्हाला बुलेट आणि मेट्रो नको आहे, त्या लोकल फेऱ्या वाढवा आणि बदलापूर रेल्वेस्थानकात सगळ्या सोयीसुविधा लवकरात लवकर द्या, अशी मागणी केली जात आहे.
------------------------------
बदलापूर गाव ते बदलापूर स्थानक असा तीन ते चार किलोमीटरचा प्रवास करून, स्थानकात येऊन थांबल्यावर कधी लोकल उशिरा असल्यास आणि स्वच्छतागृहाची गरज असल्यास त्याची सोय होत नाही. या गोष्टीचा त्रास सर्वच महिलांना होतो.
सेजल पांगरीकर, महिला प्रवासी
----------------------------------
स्थानकावर शौचालय नसल्याने आणि फलाट क्रमांक तीनवरील शौचालयाची स्वच्छताच नसल्याने आहे त्याच स्थितीत लघवी दाबून छत्रपती शिवाजी महाराज टर्मिनसपर्यंत प्रवास करावा लागतो. त्यामुळे निदान एक शौचालय तरी रेल्वे प्रशासनाने आम्हाला द्यावे.
मेघा हेदुळकर, महिला प्रवासी