भिवंडी आयुक्तांची पालिका शाळांना भेट

भिवंडी (वार्ताहर)ः शहरातील नारळी तलाव, शांतीनगर येथील पालिका शाळांना पालिका आयुक्त अनमोल सागर, उपायुक्त बाळकृष्ण क्षीरसागर व प्रशासनाधिकारी सौदागर शिखरे यांनी गुरुवारी (ता. १०) भेट दिली. या ठिकाणी शाळा इमारत, शौचालय, विद्युत पुरवठा, स्वच्छतेबाबत माहिती घेतली.
शाळेच्या इमारतीत असलेल्या सर्व शाळांच्या मुख्याध्यापकांची संयुक्त समिती करावी, त्या मार्फत शाळेच्या सुरक्षेबाबत, स्वच्छतेबाबत इतर भौतिक सोयीसुविधांबद्दल पाठपुरावा करण्याच्या सूचना देण्यात आल्या. या वेळी आयुक्तांनी शाळांमधील विद्यार्थी पटसंख्या, शिक्षक उपस्थिती तसेच शालेय अभिलेखांची तपासणी केली. तसेच सर्व उपस्थित शिक्षकांना मार्गदर्शन करीत डिजिटल क्लासरूमचा नियमित वापर करण्याकरिता वर्ग तसेच विषयनिहाय वेळापत्रक तयार करण्याचे शिक्षकांना निर्देश दिले.