खड्ड्यांमुळे रस्‍त्‍याची चाळण

खड्ड्यांमुळे रस्‍त्‍याची चाळण
निकृष्‍ट डागडुजीमुळे खडी रस्‍त्‍यावर; अपघातांत वाढ, चालकांसह प्रवासी त्रस्‍त

अलिबाग, ता. १० (वार्ताहर) ः अलिबाग-रेवदंडा रस्त्याची खड्ड्यांमुळे अक्षरशः चाळण झाली आहे. एमएसआरडीसीकडून काही दिवसांपूर्वी खड्डे बुजवण्यात आले, मात्र त्‍यासाठी मोठ्या खडीचा वापर करण्यात आल्‍याने पावसामुळे खडी रस्‍त्‍यावर पसरल्‍याने अपघात होत आहेत. त्‍यामुळे वाहनचालकांमधून संताप व्यक्त होत आहे.
अलिबाग-रेवदंडा रस्त्यांवर ठिकठिकाणी मोठमोठे खड्डे पडले पावसामुळे तळे साचत आहेत. खड्ड्यामुळे वाहने उसळत असल्‍याने चालकांसह प्रवाशांची हाडे खिळखिळी होत आहेत. अलिबाग-रेवदंडा हा रस्ता नागाव, मुरूड या पर्यटनस्थळांना जोडणारा आहे. अवजड वाहनांची वर्दळही याच मार्गावरून होते. त्यामुळे रस्त्याचे काम चांगल्या दर्जाचे होणे गरजेचे होते. तथापी निकृष्‍ट कामामुळे वारंवार खड्डे पडत आहेत. डागडुजीची कामेही निकृष्‍ट दर्जाची होत असल्‍याने दुचाकीचे अपघात वाढले आहेत. खड्ड्यांमुळे वाहनांचा वेगही मंदावत असून, वाहतूक कोंडी होत असल्‍याने चालकांमधून संताप व्यक्‍त होत आहे.
याबाबत एमएसआरडीसी प्रशासनाकडे विचारणा केली असता, रस्त्यावरील खड्डे तत्काळ सिमेंट काँक्रीटने भरण्यात येतील. वाहनचालकांना त्रास होणार नाही, याची काळजी घेण्यात येईल, असे सांगण्यात आले आहे.

अलिबाग-रेवदंडा मार्गावरून दररोज प्रवास करतो. कुरुळजवळ मोठमोठे खड्डे पडले असून, खडी बाहेर आल्‍याने दुचाकी घसरण्याची भीती वाटते. वर्षोनुवर्षे रस्‍त्‍यांची हीच स्‍थिती असून, प्रशासनासह लोकप्रतिनिधींचे दुर्लक्ष होत आहे.
- संकेत मोरे, प्रवासी, नागाव

...............

खड्डे न बुजविल्यास आंदोलन करणार
रोहा रिक्षा संघटनेकडून प्रशासनाला निवेदन

रोहा, ता. १० (बातमीदार) ः अष्टमी येथे रेल्वे फाटकाजवळ अनेक वर्षांपासून उड्डाणपुलाचे काम सुरू आहे, तर दुचाकीकडे रोहा-नागोठणे मुख्य रस्त्यावर मोठमोठे खड्डे पडल्‍याने अपघातात वाढ झाली आहे. या रस्त्यावरून प्रवास करणे जिकिरीचे झाल्‍याने तातडीने दुरुस्त करावी अन्यथा संबंधित प्रशासनाविरोधात आंदोलन करण्यात येईल, असा इशारा रोहा रिक्षा चालक-मालक संघटनेने दिला आहे.
रोहा-नागोठणे मार्गावर उड्डाणपुलाचे काम कुर्मगतीने सुरू आहे. मोठमोठे खड्डे पडल्याने नागरिक तसेच वाहनचालकांना मार्गक्रमण होताना कसरत करावी लागते. शहरासह तालुक्यातील काही गावांना जोडणारा हा मुख्य रस्ता आहे. खराब रस्त्यामुळे सतत छोटे-मोठे अपघात होत आहेत. गतवर्षी दुचाकीवरून जात असताना महिला खड्ड्यात पडून गंभीर जखमी झाली होती आणि उपचारादरम्यान तिचा मृत्यू झाला. या घटनेमुळे प्रवासीवर्गात संतापाची लाट पसरली आहे. रेल्वे उड्डाणपुलाचे काम सुरू असताना पर्यायी मार्ग सुसज्ज करणे गरजेचे आहे, मात्र ठेकेदार व प्रशासनाला याचा विसर पडल्‍याने प्रवाशांना त्रास सहन करावा लागतो.

रस्‍त्‍याच्या दुरवस्‍थेवर नागरिकांनी आवाज उठवल्यावर, बैठक घेऊन चर्चा केली जाते. त्‍यानंतर खडी मातीचा मुलामा देत खड्डे बुजवण्याचा दिखावा केला जातो, मात्र निकृष्‍ट कामामुळे अवघ्‍या काही दिवसांत परिस्‍थिती जैसे थे होते. त्‍यामुळे आता रस्त्याच्या समस्यासंदर्भात तीव्र आंदोलन करण्याचा इशारा श्री धावीर महाराज रिक्षा चालक-मालक संघटनेने दिला आहे. संघटनेचे अध्यक्ष लिलाधर मोरे, उपाध्यक्ष रूपेंद्र मळेकर, सचिव सुनील उपाध्ये, कार्याध्यक्ष फाईक करजीकर यांनी रोहा तहसील कार्यालय, पोलिस ठाणे, रेल्वे स्‍थानक कार्यालय, सार्वजनिक बांधकाम विभाग, प्रांताधिकारी यांना निवेदन देत समस्याकडे लक्ष वेधण्याचा प्रयत्न केला आहे. १५ दिवसांत रस्‍त्‍याची दुरुस्‍ती न केल्‍यास आंदोलन करणार असल्‍याचे लिलाधर मोरे यांनी सांगितले.

बुधवारी रस्‍त्‍याची पाहणी
रोहा-नागोठणे रस्त्यावर अनेक ठिकाणी खड्डे पडले आहेत. खड्डे बुजविण्याबाबत आदेश मिळाले आहेत. त्‍यानुसार बुधवारी रस्त्याची पाहणी केली. मुख्य ठेकेदार गुजरातचा असून, मिसकॉन एजन्सीद्वारे त्‍वरित खड्डे बुजविण्याचे काम हाती घेण्यात येईल, अशी माहिती अलिबाग सार्वजनिक बांधकाम विभागाचे उपअभियंता राजीव डोंगरे यांनी दिली.

रोहा ः नागोठणे रस्त्यावर खड्डे पडल्याने वाहनचालकांना तारेवरची कसरत करावी लागते.