श्रीवर्धनमध्ये चारसूत्री भात लागवडीकडे कल

श्रीवर्धनमध्ये चारसूत्री भातलागवडीकडे कल
कृषी विभागाकडून आधुनिक शेतीचे प्रोत्साहन
श्रीवर्धन, ता. १० (बातमीदार) : श्रीवर्धनमध्ये चारसूत्री भातलागवडीकडे कल वाढला आहे. शिवाय यासाठी कृषी विभागाकडून आधुनिक शेतीसाठी प्रोत्साहन करण्यात येत आहे.
पारंपरिक पद्धतीच्या तुलनेत अधिक फायदेशीर ठरणाऱ्या चारसूत्री भातलागवडीकडे श्रीवर्धन तालुक्यातील वडवली, कापोली व खारशेत परिसरातील शेतकऱ्यांचा कल वाढताना दिसून येत आहे. कृषी विभागाच्या पुढाकाराने सुधारित तंत्रज्ञान थेट शेतकऱ्यांच्या बांधावर पोहोचवण्यात येत असून, सहाय्यक कृषी अधिकारी पंकज पाटील शेतात उतरून मार्गदर्शन करत आहेत. सध्या बहुतेक ठिकाणी भातलागवड अजूनही पारंपरिक पद्धतीने केली जाते, मात्र उत्पादन कमी आणि खर्च जास्त असल्यामुळे अनेक शेतकरी अडचणीत येतात. हीच अडचण लक्षात घेऊन कृषी विभागाने चारसूत्री, पट्टा आणि सगुणा पद्धतीचा प्रसार सुरू केला आहे. या नव्या पद्धतीमुळे कमी रोप लागतात, मजुरांची गरज कमी भासते आणि उत्पादन मात्र अधिक मिळते. तालुक्यातील वडवली, कापोली, खारशेत आदी गावांमध्ये शेतकरी आता हळूहळू नव्या पद्धतीकडे वळत आहेत. शेतकऱ्यांना प्रत्यक्ष शेतात जाऊन मार्गदर्शन केल्यामुळे विश्वास निर्माण झाला आहे. यशस्वी प्रयोग पाहून इतर शेतकरीही प्रेरित होत आहेत. कमी खर्च, अधिक नफा आणि तांत्रिक मार्गदर्शन यामुळे तालुक्यातील भात उत्पादनाचा दर्जा आणि प्रमाण निश्चितच सुधारेल, असा विश्वास कृषी विभागाने व्यक्त केला आहे.