खाडी पात्रात बेकायदा भराव

खाडीपात्रात बेकायदा भराव
महसूल विभागाच्या अहवालात निष्कर्ष
सकाळ वृत्तसेवा
डोंबिवली, ता. १० : खाडी परिसरात बेकायदा भराव टाकून तेथे बांधकामाची आखणी करणाऱ्या भूमाफियांविरोधात महसूल विभागाने कठोर कारवाईची पावले उचलली आहेत. डोंबिवली पश्चिमेतील देवीचापाडा गणेशघाट विसर्जन परिसरात उल्हास खाडीकिनारी दुसऱ्यांदा बेकायदा भराव टाकल्याने नुकतीच पाहणी महसूल, वन, कांदळवन, पोलिस, पालिका अधिकाऱ्यांनी केली. भूमाफियांनी खारफुटी नष्ट करून खाडीपात्रात बेकायदा भराव केल्याचा निष्कर्ष पाहणी पथकाने काढला आहे. याप्रकरणी आता पुढे कायदेशीर कारवाई करण्यात येणार असल्याचे समजते.

डोंबिवली पश्चिमेत देवीचापाडा येथे गेल्या वर्षापासून काही भूमाफिया खाडीकिनारा परिसरातील खारफुटी तोडून तेथे माती, डेब्रिजचे बेकायदा भराव टाकत आहेत. तसेच बेकायदा बांधकाम करण्याची योजना करत असल्याची बाब गेल्या वर्षी महसूल अधिकाऱ्यांच्या लक्षात आली. त्या वेळी महसूल विभागाने तेथे पाहणी करून याप्रकरणी तहसीलदार सचिन शेजाळ यांना अहवाल दिला होता. वरिष्ठांच्या आदेशावरून विष्णुनगर पोलिस ठाण्यात स्थानिक मंडळ अधिकारींच्या तक्रारीवरून हा बेकायदा भराव केल्याप्रकरणी पोलिसांनी गुन्हा दाखल केला आहे. या प्रकरणाची चौकशी सुरू असतानाच गेल्या महिन्यांत पालिका, महसूल अधिकाऱ्यांच्या बांधकाम किंवा माती भराव करण्याबाबत कोणतीही परवानगी न घेता भूमाफियांनी देवीचापाडा खाडीकिनारा भागातील खारफुटी तोडून तेथे मातीचे भराव केले आहेत.

आधीच गुन्हा दाखल असताना भूमाफिया पुन्हा असे प्रकार करत असल्याने महसूल विभागाने कठोर पावले उचलली आहेत. जागरूक नागरिकांनी खाडीत नव्याने करण्यात आलेल्या भरावप्रकरणी पुन्हा महसूल अधिकाऱ्यांकडे तक्रारी केल्या. अधिकाऱ्यांनी भराव जागेची पाहणी करून तहसीलदारांना अहवाल पाठविला. या अहवालानंतर पुन्हा महसूल अधिकाऱ्यांनी पर्यावरण संवर्धनाच्या एका समितीला बेकायदा भराव प्रकरणाची पाहणी करण्यास सांगितले.

महसूल विभागाच्या पथकाकडून पाहणी
देवीचापाडा येथील पोलिस पाटील लक्ष्मीकांत भोईर, पर्यावरण दक्षता मंडळाच्या रूपाली शाईवाले, सहाय्यक आयुक्त राजेश सावंत, महसूल, कांदळवन आणि वन अधिकारी, मंडळ अधिकारी रवींद्र जमदरे, ग्राम महसूल अधिकारी अरूण कासार या पाहणी पथकाने नुकतीच पाहणी केली आहे. वरिष्ठांच्या मार्गदर्शनानुसार हा बेकायदा भराव करणाऱ्या अज्ञाताविरुद्ध गुन्हा दाखल होणार असल्याची शक्यता अधिकाऱ्यांनी वर्तवली आहे.