दरड प्रवणक्षेत्रातील कारवाईवरून वादंग

भिवंडी, ता. १० (वार्ताहर)ः नागाव गायत्रीनगर परिसरातील डोंगरावरील दरडीचा भाग कोसळल्याने सात घरांचे नुकसान झाले होते. या दुर्घटनेनंतर पालिकेने घाईघाईत २८ जून रोजी रस्त्यालगत असलेल्या घरांची वीज, पाणीपुरवठा खंडित केला होती. या कारवाईमुळे कायदा सुव्यवस्थेचा प्रश्न निर्माण झाल्याने पालिकेने कारवाईपूर्वी लोकप्रतिनिधींना विश्वासात घेण्याची गरज समाजवादी पार्टीचे आमदार रईस शेख यांनी व्यक्त केली आहे.
पालिकेच्या आपत्ती व्यवस्थापन विभागाने घाईघाईत ही कारवाई केल्याचा आरोप शेख यांनी केला आहे.
मुंबई पालिका क्षेत्रात डोंगरावरील दरड प्रवण क्षेत्र संरक्षक भिंत उभारण्यासाठी निधी दिला जातो, तर तालुक्यातील आतकोली येथील शासकीय जमीन ठाणे महापालिकेने कचराभूमीसाठी दिली आहे, पण स्थानिक ग्रामपंचायतींची कोणतीही परवानगी घेतली गेलेली नाही. तसेच प्रदूषण नियंत्रण महामंडळाकडून परवानगीशिवाय दररोज शेकडो टन कचरा आणून टाकला जात आहे. या प्रकाराला स्थानिक ग्रामस्थांचा विरोध असताना मुख्यमंत्री देवेंद्र फडणवीस यांनी स्थानिक जनतेला न्याय द्यावा, अशी मागणी आमदार शेख यांनी केली आहे.
-------------------------------
एकच धोरण हवे!
दुर्घटना घडलेले ठिकाण, त्यानंतर कारवाईचे ठिकाण वेगवेगळे होते. मग पालिका प्रशासनाला कारवाईची घाई का, असा सवाल करताना एमएमआर क्षेत्रासाठी आपत्ती व्यवस्थापन एकच धोरण कार्यान्वित करा, अशी मागणी केली.