गणेशपुरीत गुरुपौर्णिमेचा अभुतपूर्व सोहळा

वज्रेश्वरी, ता. १० (बातमीदार)ः भगवान नित्यानंद स्वामींचे चरणस्पर्श झालेल्या ठाणे जिल्ह्यातील प्रसिद्ध तीर्थक्षेत्र असलेल्या गणेशपुरीत गुरुपौर्णिमा उत्सव मोठ्या उत्साहात साजरा करण्यात आला. या सोहळ्याला महाराष्ट्रातूनच नव्हे, तर परराज्यातील भाविक मोठ्या संख्येने आले होते.
गणेशपुरी येथे गुरुपौर्णिमा उत्सवानिमित्त सुरू झालेल्या अखंड हरिनाम सप्ताहाची समाप्ती झाली. या सोहळ्यात बाबांच्या भक्तांनी सहभाग घेत परिसरातील वातावरण ॐ नमो भगवते नित्यानंदाय या गजराने आनंदी केले. या दिवशी मंदिर परिसर, गाभारा येथे विविध फुलांची आकर्षक सजावट करण्यात आली होती. भाविकांसाठी पहाटे साडेतीन वाजताच समाधी मंदिर खुले करण्यात आले. टाळ, मृदंगाच्या गजरात भाविक भजन करीत होते.
यामध्ये दक्षिण भारतीय तसेच कोळी बांधवांचा भरणा अधिक होता. पहाटे स्वामींच्या समाधीला महाअभिषेक करून भक्तांना थेट समाधी स्थानापर्यंत सोडण्यात येत होते. या सोहळ्यासाठी परिसरातून पायी दिंड्याही शाळकरी मुलांसह सहभागी झाल्या होत्या.
------------------------------------------
पालखी मुख्य आकर्षण
सायंकाळी सोहळ्याचे मुख्य आकर्षण असलेला बाबांचा पालखी सोहळा काढण्यात आला होता. या वेळी गणेशपुरी गावातील तरुण मंडळींचा सहभाग उत्साहपूर्ण होता. गावातून वाजत गाजत मिरवणूक काढून पालखी काढण्यात आली. या सोहळ्यासाठी परिसरातील ग्रामस्थांनी मोठी गर्दी केली होती. या वेळी कोणताही अनुचित प्रकार घडू नये, यासाठी गणेशपुरी पोलिसांचा अतिरिक्त बंदोबस्त तैनात होता.