पनवेल महापालिका उभारणार अंतराळ संग्रहालय

पनवेल महापालिका उभारणार अंतराळ संग्रहालय
खारघरमध्ये ३२,२६२.६१ चौरस मीटरवर साकारणार प्रकल्‍प; ४२ कोटी खर्च अपेक्षित

खारघर, ता. १० (बातमीदार) ः मुंबईतील नेहरू तारांगणच्या धर्तीवर पनवेल महापालिकेच्या माध्यमातून खारघर सेक्टर-३५ मध्ये अंतराळ संग्रहालय उभारण्यात येणार आहे. यासाठी जवळपास ४२ कोटी रुपये खर्च अपेक्षित असून, या प्रस्‍तावाला प्रशासनाने मंजुरी दिली आहे. त्‍यामुळे लवकरच कामाला सुरुवात होणार आहे. अंतराळ संग्रहालयामुळे भावी शास्‍त्रज्ञांसाठी माहितीचे नवे दालन खुले होणार आहे.
मुंबई येथील नेहरू तारांगण केंद्र खगोलशास्त्र आणि विज्ञानाला प्रोत्साहन देण्यासाठी एक प्रमुख ठिकाण आहे. या केंद्रात शैक्षणिक मनोरंजनाच्या माध्यमातून वैज्ञानिक दृष्टिकोन विकसित करण्यासाठी विविध खगोलशास्त्रीय विषयांवर चर्चा आणि व्याख्याने आयोजित केली जातात. पनवेल परिसरातील नागरिक आणि विद्यार्थ्यांना अंतराळाबाबत माहिती मिळावी, विज्ञान-तंत्रज्ञान क्षेत्रातील आवड निर्माण करण्यासाठी पनवेल महापालिकेच्या माध्यमातून अंतराळ संग्रहालय उभारण्यात येणार आहे.
खारघर सेक्टर-३५, एच प्लॉट क्रमांक १ मध्ये ३२,२६२.६१ चौरस मीटर जागेवर हे संग्रहालय उभारण्यात येणार असून, पालिका प्रशासनाने या प्रकल्पाला मंजुरी दिली आहे. त्यासाठी महापालिका जवळपास ४२ कोटी रुपये खर्च करणार असून, ३,४८५.१० चौरस मीटर जागेवर तळ घर, पहिला मजला अशी भव्य इमारत उभारण्यात येणार आहे. या ठिकाणी प्रदर्शन भरविण्यासाठी मोठ्या प्रमाणात जागा उपलब्‍ध करण्यात येणार आहे. याशिवाय १२० आणि २०० विद्यार्थी क्षमता असलेले बहुउद्देशीय सभागृह असेल. प्रकल्पासाठी लागणाऱ्या जागेसाठी सिडकोने मंजुरी दिली आहे. तसेच हा प्रकल्प उभारण्यासाठी आणि बांधकामासाठी पनवेल महापालिका प्रशासनाने मंजुरी दिली आहे. विशेष म्हणजे हा प्रकल्प सेंट्रल पार्क, खारघर कार्पोरेट आणि पेठ पाडा मेट्रो स्थानकापासून जवळ आहे.

पनवेल महापालिका आयुक्त मंगेश चितळे यांच्या मार्गदर्शनाखाली हे नावीन्यपूर्ण अंतराळ संग्रहालय उभारण्यात येणार आहे. प्रकल्पला प्रशासनाने मंजुरी दिली असून, बांधकाम परवानगीसाठी सिडकोकडे पत्रव्यवहार करण्यात आला आहे. परवानगी मिळाल्यावर निविदा काढून संग्रहालयाच्या कामाला सुरुवात होणार आहे.
- संजय कटेक, मुख्य अभियंता, पनवेल महापालिका