लोखंडी कॉईल वाहतूक करणारा ट्रेलर पलटी, चालक जखमी

रोहा येथे ट्रेलर पलटी; एक जखमी
रोहा, ता. १० (बातमीदार) ः लोखंडी कॉइल वाहतूक करणारा ट्रेलर पलटी झाल्याने भीषण अपघात झाला आहे. सुतारवाडीजवळील गवळवाडी फाट्यावर ही घटना घडली. यात ट्रेलरचालक गंभीर जखमी झाला आहे.
मुंबई-गोवा महामार्गावरून सुतारवाडी मार्गे माणगाव तालुक्यातील विले-भागात एमआयडीसीमधील पोक्सो कंपनीमध्ये अवजड वाहनातून हजारो टन वजनाची लोखंडी कॉइलची वाहतूक होत असते. या मार्गावर धोकादायक वळण असल्याने नेहमीच येथे अपघातात होत असतात. बुधवारी (ता. १०) सकाळी ९ वाजेच्या सुमारास सुतारवाडी गावाजवळील गवळवाडी येथे धोकादायक वळणावर ट्रेलरचालकाचा गाडीवरून ताबा सुटल्याने तो डाव्या बाजूला पलटी झाला. या अपघातात ट्रेलरचालक गंभीर जखमी झाला असून, त्याला तातडीने रुग्णालयात उपचारासाठी दाखल केले आहे.

फोटो कॅप्शन : सुतारवाडी मार्गावरील धोकादायक वळणावर ट्रेलर पलटी झाला.