पंजाबमधून अमलीपदार्थ विक्रीचे धारेदोरे

पंजाबमधून अमली पदार्थ विक्रीचे धारेदोरे
नऊ जणांना अटक; ४७ लाखांचे हेरॉइन जप्त
नवी मुंबई, ता. १० (वार्ताहर) : पंजाब येथून नवी मुंबईत अमली पदार्थ आणून त्याची विक्री करणाऱ्या नऊ जणांच्या टोळीला नवी मुंबई पोलिसांच्या अमली पदार्थविरोधी पथकाने अटक केली आहे. तसेच त्‍यांच्याकडून तब्बल ४७ लाख रुपये किमतीचा हेरॉइनचा साठा जप्त केला आहे. चार ते पाच महिन्यांपासून या टोळीने पंजाब येथून अमली पदार्थांची तस्करी सुरू केल्याचे तपासात आढळले आहे. टोळीत सहभागी असलेल्या आणखी काही आरोपींचा अमली पदार्थविरोधी पथकाकडून शोध घेण्यात येत आहे.
अमली पदार्थविरोधी पथकाने ४ जुलैला सायंकाळी सीबीडी बेलापूर येथील पाम बीच मार्गावरील सी-शोर लॉजवर छापा टाकून तब्बल १५ लाख २८ हजार रुपये किमतीचे एकूण ३८.२ ग्रॅम वजनाचे हेरॉइन जप्त केले होते. हे अमली पदार्थ पंजाब येथून आणणाऱ्या परमजीत सिंग महिंदर सिंग (२९) व सुखविंदर दारा सिंग (३५) या दोघांना अटक केली होती. चौकशीत त्यांना नवी मुंबईतील मोनू व डिझेल या दोघांनी अमली पदार्थ घेऊन बोलावल्याचे तसेच त्यांनी पंजाब येथून नवी मुंबईत हेरॉइन विक्रीसाठी आणल्याचे सांगितले होते.
मोनू व त्याच्या इतर साथीदारांनी त्यांच्याकडून हेरॉइन विक्रीसाठी नेल्याचे चौकशीत कबूल केले होते. त्यानुसार अमली पदार्थविरोधी पथकाने तपास करत बेलापूरमधील दिवाळे गावातून मोनू चंदेर सिंग याला तसेच अरविंद रामशंकर प्रसाद ऊर्फ डिझेल, मनप्रीत ऊर्फ पप्पू कुमार, हरप्रीत सिंग ऊर्फ हॅप्पी व गुरप्रीत सिंग ऊर्फ पाडा या पाच जणांना अटक केली. तसेच त्यांच्याकडे असलेले तब्बल ३२ लाख रुपये किमतीचे ८० ग्रॅम वजनाचे हेरॉइन जप्त केले.

कळंबोलीतील लॉजवर मुक्‍काम
पोलिसांनी केलेल्‍या चौकशीत पंजाब येथून चार जण अमली पदार्थ घेऊन आल्याचे तसेच उर्वरित दोघे कळंबोलीतील एका लॉजवर थांबल्याची माहिती मिळाली. त्यानुसार पथकाने छापा मारून सतनाम सिंग सुखदेवसिंग व सुखविंदर सिंग मुकनारसिंग या दोघांना अटक केली. कारवाईत अटक केलेले सर्व नऊ आरोपी पंजाबमधील असून त्यांच्याकडून तब्बल ४७ लाख रुपये किमतीचे हेरॉइन जप्त करण्यात आल्याचे वरिष्ठ पोलिस निरीक्षक संदीप निगडे यांनी सांगितले.