अनधिकृत गोडाऊनवर महापालिकेचा बुलडोझर

तुर्भे येथील अनधिकृत गोडाऊनवर महापालिकेचा बुलडोझर
सिडको ट्रक टर्मिनलमध्ये लागली होती आग
तुर्भे, ता. १० (बातमीदार) : येथील सिडको ट्रक टर्मिनलमध्ये आग लागण्यास कारणीभूत ठरलेल्या अनधिकृत गोडाऊनवर महापालिकेने गुरुवारी (ता. १०) धडक कारवाई केली. नवी मुंबई महापालिकेचे आयुक्त डॉ. कैलास शिंदे आणि अतिरिक्त आयुक्त डॉ. राहुल गेठे यांच्या आदेशाने अतिक्रमण विभागाचे उपायुक्त डॉ. कैलास गायकवाड यांच्या मार्गदर्शनाखाली विभाग अधिकारी सागर मोरे यांच्या पथकाने ही कारवाई केली.
तुर्भे ट्रक टर्मिनलमधील अनधिकृत गोडाऊनमध्ये कोळसा, प्लॅस्टिक कॅरेट, कागदी पुठ्ठे बॉक्स, गॅरेज यांसह इतर ज्वलनशील वस्तूंची साठवणूक केली होती.

अखेर रविवारी (ता. ६) रात्री यातील एका गोडाऊनमध्ये आग लागल्याने पार्किंगमधील आठ ट्रक, एक जेसीबी आणि ज्वलनशील वस्तूंचे पाच गोडाऊन आगीच्या भक्षस्थानी पडले. सिडको आणि महापालिका अधिकाऱ्यांच्या दुर्लक्षामुळे ही गंभीर दुर्घटना घडली. या घटनेनंतर अतिरिक्त आयुक्त डॉ. राहुल गेठे यांनी या पार्किंगमधील सर्व अवैध गोष्टींवर धडक कारवाई करण्याचे आदेश विभाग अधिकारी सागर मोरे यांना दिले होते. त्यानुसार पोलिस बंदोबस्तासह ट्रक टर्मिनलमधील गोडाऊन, गॅरेज आणि हॉटेल यांच्या एकूण २० तात्पुरत्या शेडवर कारवाई करून ती भुईसपाट करण्यात आली. या कारवाईमध्ये संबंधितांकडून एक लाख ९० हजार रुपये शुल्कदेखील वसूल करण्यात आले. लवकरच या परिसरातील अशाच प्रकारे सिडकोच्या भूखंडातील आणखी एका भूखंडामध्ये अनधिकृतपणे प्लॅस्टिक कॅरेट साठवणाऱ्या गोडाऊनवरही कारवाई करण्यात येणार असल्याचे सूत्रांनी सांगितले.

बेकायदा गोष्टी होत्या सुरू
सिडकोने ही जागा केवळ ट्रक टर्मिनलला दिली असताना या ठिकाणी अनेक बेकायदा गोष्टी मागील दोन वर्षांपासून सुरू होत्या. या अनधिकृत गोष्टींमुळे भविष्यात या ठिकाणी दुर्घटना घडण्याची शक्यता असल्याचे अनेक बातम्यांच्या माध्यमातून प्रशासनाच्या निदर्शनास आणून दिल्या होत्या. दरम्यान, स्थानिक लोकप्रतिनिधींच्या राजकीय दबावामुळे यावर कारवाई होत नव्हती.