मतदारांवर सवलतींचा पाऊस

मतदारांवर सवलतींचा पाऊस
पालिका निवडणुकीच्या पार्श्वभूमीवर इच्छुकांच्या नामनियुक्त्या
सकाळ वृत्तसेवा
डोंबिवली, ता. १० : आगामी पालिका निवडणुकीच्या पार्श्वभूमीवर इच्छुकांनी मतदारांना आकर्षित करण्यासाठी वेगवेगळ्या युक्त्या लढवण्यास सुरुवात केली आहे. डोंबिवली शहरातील इच्छुकांनीदेखील जोरदार तयारी सुरू केली आहे. कोणी मतदारांना मोफतमध्ये हेअर कलर करून देत आहे, तर कोणी स्वस्त दरात टीव्ही, फ्रीज, सायकल, वॉटर फिल्टर यांसारख्या सोयी-सुविधा देऊ केल्या जात आहेत. यामुळे मतदारांवर सवलतींचा पाऊस पडत असल्याचे म्हटले जात आहे.

राजकीय मंडळींकडून निवडणुकीच्या पार्श्वभूमीवर मतदारांना आकर्षित करण्यासाठी विविध प्रकारचे उपक्रम, योजना आणि प्रलोभनात्मक कार्यक्रम राबवले जातात. कल्याण डोंबिवली महापालिकेत प्रशासकीय राजवट लागू आहे. त्यामुळे इच्छुक उमेदवार निवडणुका कधी लागतात याची आतुरतेने वाट पाहात आहेत. मध्यंतरी दोन ते तीन वेळा निवडणूक होणार अशी चर्चा झाली. त्या वेळी इच्छुकांनी कोरोना महामारीच्या काळात नागरिकांना विविध गरजेच्या वस्तूंचे वाटप केले होते; मात्र नंतर निवडणुका न लागल्याने अनेकांचा हिरमोड झाला होता. आता अखेर न्यायालयाच्या आदेशानंतर स्थानिक स्वराज्य संस्थांच्या निवडणुका पार पडणार आहेत. कल्याण डोंबिवली महापालिकेची निवडणूक लवकरच लागण्याची शक्यता वर्तविली जात आहे. आगामी निवडणुकीच्या पार्श्वभूमीवर आपल्या वॉर्डातील नागरिकांना खूश करण्यास, मतदारांना आपल्याकडे खेचण्यासाठी इच्छुकांनी वेगवेगळे कार्यक्रम राबविण्यास सुरुवात केली आहे.

विविध कार्यक्रमांचे आयोजन
पावसाळ्यात इच्छुकांनी मतदारसंघात मोफत छत्री वाटप, शालेय मुलांना मोफत वह्या वाटप केले. तसेच मे महिन्यात डोंबिवली पश्चिमेला शिवसेना शिंदे गटाचे माजी नगरसेवक जनार्दन म्हात्रे व त्यांच्या पत्नी माजी नगरसेविका रेखा म्हात्रे यांनी मोफत हेअर कलर शिबिराचे आयोजन केले होते. यानंतर आता शिंदे गटाचे माजी नगरसेवक रणजित जोशी व त्यांच्या पत्नी माजी नगरसेविका वृषाली जोशी यांच्या वतीने एका अनोख्या कार्यक्रमाचे आयोजन केले आहे. यात जनतेसाठी ५० टक्क्यांची सवलत एलईडी टीव्ही, सायकलवर देण्यात आली आहे. तसेच रेंजर सायकल व पाण्याच्या फिल्टरचे वाटपाचा कार्यक्रम ठेवला आहे.

आधार कार्ड घेऊन येण्याचे आवाहन
आगामी निवडणुका पाहता इच्छुकांनी मतदारांना खूश करण्यासाठी विशेष सवलती देत भेट वस्तूंचे वाटप करण्यास सुरुवात केल्याने याचा इच्छुकांना किती फायदा होतो, हे पाहावे लागेल. दरम्यान, नागरिकांना आधार कार्ड व रेशनिंग कार्ड घेऊन येण्याचे आवाहन केले जात आहे.