एनएमआयएमएस ला नॅक चा ए प्लस प्लस दर्जा

एनएमआयएमएसला नॅकचा ए प्लस प्लस दर्जा
मुंबई, ता. १० : श्री विलेपार्ले केळवणी मंडळाच्या एनएमआयएमएस या अभिमत विद्यापीठाला राष्ट्रीय मूल्यांकन आणि मान्यता परिषदेच्या चौथ्या मूल्यांकनात ए प्लस प्लस हा सर्वोच्च दर्जा आणि ३.६७ असा सीजीपीए मिळाला आहे.
कुलपती अमरीश पटेल यांच्या नेतृत्वामुळे विद्यापीठाला हे यश मिळाले आहे. यामुळे विद्यापीठाची शैक्षणिक गुणवत्ता, संस्थात्मक काटेकोरपणा आणि विद्यार्थ्यांच्या सर्वांगीण विकासासाठी केलेले प्रयत्न यांनाच पावती मिळाली आहे, असे विद्यापीठाचे कुलगुरू डॉ. रमेश भट यांनी सांगितले.
विद्यापीठाला २०१७च्या तिसऱ्या मूल्यांकनात ३.५९ असा सीजीपीए मिळाला होता. या वेळी त्यात वाढ झाली. हे मानांकन अत्यंत सखोल मूल्यांकन प्रक्रियेनंतर दिले जाते. यात अभ्यासक्रमविषयक बाबी, संशोधन निष्पत्ती, अध्यापन आणि अध्ययन प्रक्रियेचे मूल्यमापन, पायाभूत सुविधा, विद्यार्थी सहाय्य, प्रशासन आणि कार्यपद्धती यांचा समावेश असतो. आताचा हा दर्जा सात वर्षे वैध आहे.
गुणवत्तापूर्ण शिक्षणाच्या सर्व पैलूंमध्ये आमची सातत्यपूर्ण प्रगती या दर्जामुळे अधोरेखित होत आहे. पंतप्रधानांनी मांडलेल्या विकसित भारत या दृष्टिकोनात सक्रिय सहभाग घेणे हे आमचे उद्दिष्ट आहे, असे विद्यापीठाच्या प्र-कुलगुरू डॉ. मीना चिंतामणेणी यांनी सांगितले.