समान अन्‌ सन्मानजनक वेतन द्या

समान अन्‌ सन्मानजनक वेतन द्या
महाराष्ट्र वरिष्ठ निवासी डॉक्टर संघटनेची मागणी
सकाळ वृत्तसेवा
मुंबई, ता. १० : महाराष्ट्र वरिष्ठ निवासी डॉक्टर संघटनेने (एमएसआरडीए) बृहन्मुंबई महापालिकेच्या उपनगरांतील रुग्णालयांत कार्यरत वरिष्ठ निवासी डॉक्टरांच्या वेतनातील तफावतीवर तीव्र आक्षेप नोंदवला आहे. मुंबईचे आरोग्य सांभाळणाऱ्या सर्व रुग्णालयांतील निवासी डॉक्टरांसाठी एकसमान आणि सन्मानजनक विद्यावेतन लागू करावे, अशी मागणी नोंदवली आहे.

पदव्युत्तर पदवी, जबाबदाऱ्या आणि निवड प्रक्रियेतील समानतेनंतरही या डॉक्टरांना तृतीय दर्जाच्या रुग्णालयांतील त्यांच्या सहकाऱ्यांपेक्षा दरमहा ३० हजार ते ४० हजार रुपयांनी कमी वेतन दिले जाते. मुंबईसारख्या महानगरात ही वागणूक अपमानास्पद आहे. मुंबईला चांगली आरोग्यसेवा हवी असल्यास डॉक्टरांना सन्मान मिळाला पाहिजे, असे मत महाराष्ट्र वरिष्ठ निवासी डॉक्टर संघटनेचे अध्यक्ष डॉ. अभिजित हेलगे यांनी सांगितले.

ठाण्यासारखी महापालिकादेखील १.२ रुपये लाखांच्या जवळपास विद्यावेतन देते. दिल्लीत सरासरी १.२ लाख रुपयांहून अधिक विद्यावेतन दिले जाते. राज्यशासित वैद्यकीय महाविद्यालयांत वरिष्ठ निवासी डॉक्टरांना दरमहा ९५ हजार रुपये दिले जातात. पालिकेच्या स्वतःच्या वैद्यकीय महाविद्यालयांत वरिष्ठ निवासी डॉक्टरांना दरमहा एक लाखापेक्षा जास्त वेतन दिले. उपनगरी रुग्णालयांतील वरिष्ठ निवासी डॉक्टरांना केवळ ६५ हजार उद्‌गम कर कापून वेतन दिले जाते. ही बाब अत्यंत लज्जास्पद आहे. या डॉक्टरांनाही समान वेतन मिळावे, असे पत्र पालिका आयुक्तांना संघटनेतर्फे देण्यात आले आहे.