नवी मुंबईत पार्किंगचा बोजवारा

नवी मुंबईत पार्किंगचा बोजवारा
वाहनचालकांकडून नियमांचे उल्लंघन; वाहतूककोंडीमुळे नागरिक हैराण
वाशी, ता. १० (बातमीदार) : नवी मुंबईतील वर्दळ असणाऱ्या प्रमुख मार्गांसह अंतर्गत रस्‍त्‍यांवर बेशिस्‍त पार्किंगमुळे मोठ्या प्रमाणात वाहतूक कोंडी होत आहे. शहरात नो पार्किंग, समांतर, सम-विषम पार्किंगचे फलक बसविण्यात आले आहेत; परंतु वाहनचालकांकडून फलकावरील नियमांचे उल्लंघन होत आहे. त्‍यामुळे वाहतुकीचे नियम मोडणाऱ्या वाहनांवर कारवाई करण्याची मागणी नवी मुंबईकरांकडून करण्यात येत आहे. अनेक ठिकाणी वाहनतळदेखील अपुरे पडू लागल्याने पार्किंगची समस्या उद्भवत असल्याचे बोलले जात आहे. त्‍यामुळे पोलिस प्रशासनासह पालिकेने पार्किंग समस्येवर तोडगा काढावा, अशी मागणी करण्यात येत आहे.
नवी मुंबईकडे नियोजित शहर म्‍हणून पाहिले जाते. शहराची रचना नियोजनबद्ध झाली असली तरी वाढत्या नागरीकरणामुळे वाहनांची संख्या मागील काही वर्षांत लक्षणीय वाढली आहे. शिवाय नवी मुंबईत कामानिमित्त येणाऱ्या नागरिकांच्या संख्येत वाढ झाली आहे. त्‍यामुळे दिवसेंदिवस पार्किंगची समस्या मोठ्या प्रमाणावर निर्माण झाली आहे. ऐरोली, कोपरखैरणे, घणसोली, सीबीडी, सीवूड्स, नेरूळ, जुईनगर, सानपाडा, वाशी भागातील अंतर्गत रस्‍ते, मार्केट, रेल्वेस्थानके, चौक, शाळा-महाविद्यालयांबाहेरील मार्ग आदी ठिकाणी सकाळ-सायंकाळ मोठ्या प्रमाणात वाहतूक कोंडी होऊ लागली आहे. पालिकेने शहरातील मुख्य मार्गांसह अंतर्गत रस्‍त्‍यांवर नो पार्किंग, समांतर, सम-विषम पार्किंगचे फलक बसविण्यात आले आहेत; मात्र त्‍याकडे वाहनचालकांकडून नियमांचेे सर्रास उल्लंघन केले जात आहे. रस्त्यांच्या कडेला मोठ्या प्रमाणावर बेकायदा पार्किंग केली जात आहे. त्यामुळे अंतर्गत रस्‍त्यांवर चक्‍का जाम होऊन आपत्कालीन परिस्‍थिती निर्माण होऊ लागली आहे. अनेक वेळा रुग्णवाहिकांना अडथळा येत आहे. त्‍यामुळे अतिदक्षता असलेल्या रुग्णांच्या जीवावर बेतत आहे. त्‍यामुळे बेशिस्‍त गाड्या पार्क करणाऱ्या चालकांवर कठोर कारवाई करावी, अशी मागणी करण्यात येत आहे. शाळा-महाविद्यालय परिसरात तर भयावह परिस्‍थिती निर्माण होत आहे. ऐरोली येथील नवी मुंबई महापालिकेच्या रुग्णालयासमोरदेखील नो पार्किंगचे फलक असताना, बेकायदा पार्किंग करण्यात येत आहे. वाहतूक पोलिसांकडे कर्मचारी तसेच टोइंग व्हॅनची संख्या कमी असल्याचे कारण पुढे करण्यात येत आहे. याबाबत पोलिस उप आयुक्त तिरुपती काकडे यांच्याशी संपर्क साधला असता होऊ शकला नाही.
..........
कोट
नवी मुंबईमध्ये होणाऱ्या वाहतूक कोंडीच्या अनुषंगाने पालिका, सिडको, वाहतूक पोलिस यांची वॉर्ड ऑफिसर स्तरावर बैठक झाली आहे. शहरातील नो-पार्किंग, सम-विषम पार्किंगचे नियोजन करण्यात येत आहे. वाहतूक पोलिसांकडून यांची अधिसूचना जारी झाल्यानंतर त्याचे नियोजन करण्यात येईल.
- भागवत डोईफोडे, उपायुक्त, नवी मुंबई महापालिका