राज ठाकरे १८ जुलैला मिरा रोडमध्ये

राज ठाकरे १८ जुलैला मिरा रोडमध्ये
भाईंदर, ता. १० (बातमीदार) : मनसेने मराठी भाषेच्या मुद्द्यावर नुकताच मिरा रोडमध्ये काढलेला मोर्चा यशस्वी ठरला. आता मनसेप्रमुख राज ठाकरे येत्या १८ जुलैला मिरा रोडमध्ये येत आहेत. त्यांच्या हस्ते मनसेच्या कार्यालयाचे उद्घाटन होणार आहे. या वेळी राज ठाकरे काय बोलतात, याकडे सर्वांचे लक्ष लागून आहे.
मनसे व मराठी एकीकरण समिती यांच्या संयुक्त विद्यमाने मिरा रोडमध्ये ८ जुलैला मोर्चा काढण्यात आला होता. त्या वेळी मोर्चासाठी जमलेल्या कार्यकर्त्यांची व नेत्यांची पोलिसांनी धरपकड केल्यामुळे परिसरात तणाव निर्माण झाला होता. त्या वेळी राज ठाकरे मिरा रोडमध्ये येणार असल्याची जोरदार चर्चा सुरू झाली होती. प्रत्यक्षात मात्र मनसेचे नेते संदीप देशपांडे व नितीन सरदेसाई मिरा रोडमध्ये दाखल झाले. परंतु, येत्या १८ जुलैला ठाकरे मिरा रोडमध्ये येणार असल्याचे नक्की झाले आहे. मिरा रोडमधील मनसेच्या कार्यालयाचे त्यांच्या हस्ते उद्घाटन केले जाणार आहे, अशी माहिती मनसेचे मिरा-भाईंदर शहर अध्यक्ष संदीप राणे यांनी दिली.