नव्याने डांबरीकरण केलेल्या रस्त्यांवर खड्डे

नव्याने डांबरीकरण केलेल्या रस्त्यांवर खड्डे
शेकापकडून पनवेल पालिका आयुक्‍तांकडे तक्रार
पनवेल, ता. १० (बातमीदार) ः पनवेल महापालिका क्षेत्रातील नव्याने डांबरीकरण करण्यात आलेल्या रस्त्यांची चाळण झाली आहे. ठिकठिकाणी खड्डे पडले आहेत. याप्रकरणी शेतकरी कामगार पक्षाचे पनवेल जिल्हा कार्याध्यक्ष महादेव वाघमारे यांनी आवाज उठवला आहे. त्यांनी यासंदर्भात पालिका आयुक्तांना पत्र देऊन लवकरात लवकर खड्डे बुजवून रस्‍त्‍याची दुरुस्ती करावी, अशी मागणी केली आहे.
पनवेल महापालिका क्षेत्रात खारघर, कळंबोली आदी नोडमध्ये मुख्य रस्त्यांचे काँक्रीटीकरण हाती घेण्यात आले आहे. दरम्यान, पावसाळ्यापूर्वी बऱ्याच रस्‍त्‍यांचे डांबरीकरण करण्यात आले आहे. त्यामुळे पनवेलकरांची खड्ड्यातून मुक्तता होईल तसेच वाहनचालकांना सोयीचे जाऊन त्यांची गैरसोय दूर होईल, अशी अपेक्षा व्‍यक्‍त केली जात होती, मात्र या रस्‍त्‍यांवर पावसाच्या पाण्यामुळे पुन्‍हा खड्डे पडले असल्याने वाहनचालकांकडून नाराजी व्‍यक्‍त केली जात आहे. शिवाय रस्त्यांच्या डांबरीकरणासाठी कोट्यवधी रुपये प्रशासनाने खर्च केले आहेत. संबंधित ठेकेदारांनी अत्यंत निकृष्ट दर्जाचे काम केले असल्याने पहिल्या पावसातच डांबरीकरण केलेले अनेक रस्‍ते उखडले आहेत. विशेषकरून आसूडगाव बस आगाराच्या समोरील रस्त्याची अक्षरशः चाळण झाली आहे. कळंबोली रोड पाली नाल्यावरील पुलावरील डांबरीकरणाला खड्डे पडले आहेत. महामार्ग लगतच अंतर्गत रोडवर दगड, खडी बाहेर आली आहे. त्यामुळे दुचाकीस्वार या ठिकाणी घसरून अपघात होण्याचे प्रकार वाढले आहे, तर नवीन पनवेलमधील विविध रस्त्यांची स्थितीदेखील फारशी वेगळी नाही. कामोठे नोडचा विचार करता, पनवेल-सायन महामार्ग ते मानसरोवर रेल्वेस्थानक रस्‍त्‍याचे काही महिन्यांपूर्वी डांबरीकरण झाले होते, परंतु ते अपूर्ण अवस्थेत ठेवण्यात आले आहे. डांबरीकरणाचे काम योग्य प्रकारे न झाल्यामुळे रस्‍त्‍यांची दुरवस्था झाली आहे.