घोडबंदर मार्ग खड्डेमुक्त

सकाळ वृत्तसेवा
ठाणे, ता. १० : घोडबंदर मार्गावर व उड्डाणपुलांवर खड्ड्यांचे साम्राज्य पसरले आहे. अशातच या खड्ड्यांमुळे दुचाकी व अवजड वाहनांचे नियंत्रण सुटून अपघात होण्याची शक्यतादेखील वर्तवण्यात येत आहे. अशातच गुरुवारी पावसाने सकाळपासून उघडीप घेतल्यामुळे सार्वजनिक बांधकाम विभागाने खड्डे भरण्याची कामे हाती घेतल्याचे चित्र दिसून आले.
ठाण्यातील घोडबंदर मार्ग हा हलक्या वाहनांसह अवजड वाहनांच्या वाहतुकीसाठी महत्त्वाचा मानला जात आहे. या मार्गावर सतत वाहनांची वर्दळ असते. त्यात मागील काही दिवसांपासून कोसळणाऱ्या सततच्या पावसामुळे या मार्गावर खड्डे पडतात. यंदाही हे चित्र कायम असून, घोडबंदर मार्ग आणि त्यावरील उड्डाणपुलांवर डांबरी रस्ता आहे. काही वर्षांपूर्वी मास्टिक पद्धतीने पुलावरील रस्ता तयार करण्यात आला होता. सततच्या अवजड वाहतुकीमुळे तसेच पावसामुळे हा रस्ता उखडत असून, माजिवाडा, मानपाडा, पातलीपाडा आणि वाघबीळ पुलांवर मोठे खड्डे पडले होते. हे खड्डे मास्टिकच्या सहाय्याने बुजवण्याचे काम सार्वजनिक बांधकाम विभागाने केले होते, मात्र बुजविलेले खड्डे पुन्हा उखडले असून, माजिवाडा पूल, वाघबीळचा पूल या ठिकाणी मोठे खड्डे आहेत. या खड्ड्यांमुळे अपघातांची भीती व्यक्त करण्यात येत आहे. अशातच गुरुवार सकाळपासून पावसाने विश्रांती घेतल्याने सार्वजनिक बांधकाम विभागाच्या पथकाने घोडबंदर मार्गावरील पुलावर पडलेले खड्डे बुजविण्याचे काम सुरू आहे.