रस्त्यावरील चिखलामुळे रुग्णांची परवड

पडघा, ता.१०(बातमीदार)ः पडघा गावातील महामार्गावरच प्राथमिक आरोग्य केंद्र आहे. परंतु, प्राथमिक आरोग्य केंद्राकडे जाणारा रस्ता पावसाळ्यामध्ये कायम पाण्याने भरलेला असतो. त्यामुळे रुग्णांना विविध अडचणींना सामोरे जावे लागते.
मुंबई-नाशिक हा महामार्ग असून येथे कायम छोटे-मोठे अपघात होत असतात. अशावेळी पडघा प्राथमिक आरोग्य केंद्र हे महामार्गावर असल्याने नागरिकांसाठी सोयीचे आहे. परंतु, प्राथमिक आरोग्य केंद्राकडे पुलाखालून जाणारा रस्ता खराब झाला पावसाळ्यामध्ये कायम पाण्याने भरलेला असतो. त्यामुळे अपघातग्रस्त लोकांना नेण्यासाठी तसेच आजारी नागरीकांना ये-जा करण्यासाठी सोयीचा राहिलेला नाही. पडघा परिसरातील जवळ जवळ ४० ते ५० खेडी, पाडी, गावे असून परिसरातील नागरिकांना प्राथमिक आरोग्य केंद्र हाच मोठा एकमेव आधार आहे. तसेच आजूबाजूच्या खेड्या, पाड्यातील आदिवासी बांधवांना देखील याशिवाय दुसरा पर्याय नाही. या पुलाखालून भादाणे, आतकोली, जुपाडा, चिराडपाडा येथील जाणाऱ्या हजारो नागरीकांची व वाहनाची गैरसोय होत आहे.