कल्याणमध्ये डेंग्यूमुळे एका तरुणाचा मृत्यू

कल्याणमध्ये डेंगीमुळे एका तरुणाचा मृत्यू
केडीएमसी क्षेत्रात नागरी आरोग्याचा प्रश्न ऐरणीवर
कल्याण, ता. १० : शहरातील बेतूरकरपाडा परिसरात राहत असलेल्या तरुण विलास म्हात्रे यांचा गुरुवारी (ता. १०) सकाळी डेंगीमुळे मृत्यू झाला. मनसे पक्षाने बुधवारी (ता. ९) कल्याण-डोंबिवली महापालिका मुख्यालयावर धडक देत डेंगी-मलेरियासंदर्भात प्रश्नाला प्रशासनाला धारेवर धरले. तरी प्रशासन यंत्रणा जागी झाली नसल्याचे दिसून येत आहे. यामुळे नागरिकांच्या आरोग्याचा प्रश्न ऐरणीवर आला असल्याचे चित्र आहे.
केडीएमसी हद्दीत मे महिन्यापासून आतापर्यंत डेंगीचे ३५ रुग्ण आहेत. तर मलेरियाचे जून महिन्यात ४१ रुग्ण आढळून आले. जुलै महिन्यात १८ रुग्ण आढळून आले असल्याची त्रोटक माहिती केडीएमसी प्रशासनाकडून बुधवारी देण्यात आली होती. तर केडीएमसीकडून आतापर्यंत २८ हजार घरांचे सर्वेक्षण करण्यात आले असून जवळपास ३५० घराजवळ कंटेनर ड्रममध्ये डेंगीच्या अळ्या आढळल्याचा अहवाल समोर आला आहे.
दरम्‍यान, पावसाळ्यात पाणी साचणाऱ्या घटकांत पाणी साठणार नाही, याची दक्षता घेतली पाहिजे. आरोग्य विभागातील कर्मचाऱ्यांकडून डेंगी-मलेरियासंदर्भात स्लम एरिया ते संकुलापर्यंत सर्वेक्षण केले जाते. परिसरात संभाव्य डेंगी रुग्ण आढळल्यास त्या परिसरात धुरवणी, फवारणी आदी तातडीने केली जात असल्याची माहिती अतिरिक्त आयुक्त हर्षल गायकवाड यांनी दिली आहे.