पराग संकुलात गुरुपौर्णिमा विविध उपक्रमांनी साजरी

पराग संकुलात गुरुपौर्णिमा विविध उपक्रमांनी साजरी
मुंबई, ता. १० ः पराग विद्यालय आणि ज्युनिअर कॉलेजमध्ये गुरुपौर्णिमा उत्साहात साजरी करण्यात आली. माध्यमिक विभागामध्ये गुरूचे महत्त्व सांगण्यात आले. या वेळी महर्षी व्यास ऋषींच्या प्रतिमेचे पूजन करण्यात आले. इयत्ता नववीसाठी श्री स्वामी समर्थ मंडळातून विद्यार्थ्यांसाठी गुरू उपासनेची तयारी करण्यात आली होती. माध्यमिक विभागात कथाकथन स्पर्धा आयोजित केली होती. या स्पर्धेचा विषय ‘गुरू शिष्य परंपरा’ हा होता. यात सर्व विद्यार्थ्यांनी उत्साहाने सहभाग घेतला. प्रत्येक वर्गातून प्रथम आलेल्या विद्यार्थ्यांचे पुन्हा एकदा परीक्षण करण्यात आले आणि प्रत्येक इयत्तेतून प्रथम क्रमांक काढण्यात आला. विद्यार्थ्यांचे प्रशस्तिपत्रक देऊन मुख्याध्यापकांनी कौतुक केले.
दुपार अधिवेशनात प्राथमिक विभागात गुरुपौर्णिमेनिमित्त स्वामी समर्थ मठातून सेवेकऱ्यांमार्फत विद्यार्थ्यांना गुरूचे महत्त्व या विषयावर उद्बोधन वर्गाचे आयोजन करण्यात आले. उच्च माध्यमिक विभागात वक्तृत्व स्पर्धा आयोजित केली होती. विद्यार्थ्यांना प्रमाणपत्र देऊन मुख्याध्यापिका विचारे यांनी कौतुक केले. शिष्‍यवृत्तीप्राप्त विद्यार्थ्यांचे महाराष्ट्रीय शिक्षण संस्थेचे संचालकीय अध्यक्ष बाळकृष्ण बने शेठजी, सचिव डॉ. सुभाषजी बने यांनी भेटवस्तू आणि मिठाई देऊन कौतुक केले.