अखेर त्या व्हॅन चालकासह दोन महिलांवर गुन्हे दाखल

अखेर त्या व्हॅनचालकासह दोघांवर गुन्हे दाखल
कल्याण उपप्रादेशिक विभागाकडून वाहनाचे रजिस्ट्रेशन रद्द
अंबरनाथ ता. १० (वार्ताहर) : येथील एका नामांकित शाळेच्या धावत्या स्कूल व्हॅनमधून सोमवारी (ता. ७) विद्यार्थी कोसळल्याची घटना घडली होती. या घटनेत एक विद्यार्थी गंभीररित्या जखमी झाला, तर दोन विद्यार्थी जखमी झाले होते. या प्रकरणाची अंबरनाथ पोलिसांनी दखल घेऊन व्हॅनचालकासह इतर दोन जणांवर अशा एकूण तीन जणांवर गुन्हे दाखल केले.
याप्रकरणी डीसीपी सचिन गोरे यांनी कल्याण उपप्रादेशिक विभागाला पत्रव्यवहार करून संबंधित शाळा प्रशासन, विद्यार्थ्यांची वाहतूक करणारे वाहनचालक यांच्या विरोधात कारवाई करण्याचे निर्देश दिले होते. दरम्यान, कल्याण उपप्रादेशिक विभागाने दखल घेत या शाळेला भेट देऊन संबंधित व्हॅनवर दंडात्मक कारवाई करून वाहनाचे रजिस्ट्रेशन रद्द केले, तर पंचायत समितीचे गटशिक्षणाधिकारी पोतेकर यांनी शाळेला कारणे दाखवा नोटीस बजावली आहे.

गुन्हा दाखल होणार नाही
अंबरनाथमध्ये या दुर्घटनेनंतर नागरिकांनी तीव्र संताप व्यक्त केला असून, झाल्या प्रकाराला शाळा प्रशासनही तितकेच जबाबदार असल्याचे म्हटले आहे. दरम्यान, अंबरनाथमधील ही दुसरी घटना असून, बस खासगी व पालकांनी निवडली असल्याने या शाळेला कारणे दाखवा नोटीस बजावली असून, शाळेवर गुन्हे दाखल होणार नसल्याची माहिती गटशिक्षणाधिकाऱ्यांनी दिली.