मुलुंडमध्ये अभय योजना मार्गदर्शन शिबिर

मुलुंडमध्ये अभय योजना मार्गदर्शन शिबिर
मुलुंड (बातमीदार) ः राज्‍य सरकारने झोपडपट्टी पुनर्वसन योजनेतील १ जानेवारी २०११ पूर्वी निर्गमित केलेल्या अंतिम परिशिष्ट-२ मधील झोपडीचे हस्तांतरण खरेदी-विक्री करणाऱ्या झोपडीधारकांसाठी एकवेळची अभय योजना राबवण्याचा निर्णय घेतला आहे. याची माहिती देण्यासाठी झोपडपट्टी पुनर्वसन प्राधिकरण, बृहन्मुंबई महाराष्ट्र शासन यांच्यामार्फत आणि मुलुंडचे आमदार आणि भाजप महाराष्ट्राचे कोषाध्यक्ष मिहिर कोटेचा यांच्या प्रयत्नांनी एका अभय शिबिराचे आयोजन करण्यात आले आहे. अभय योजनेंतर्गत मुलुंडमधील २३ संस्‍थांमधील अर्जदारांनी अर्ज सादर केले आहेत. आवश्यक कागदपत्रे व पुराव्यांच्या संकलनासाठी दयानंद बँक्वेट हॉल, देवी दयाल रोड, टी वॉर्ड कार्यालयाच्या समोर, मुलुंड (प) येथे शनिवारी (ता. १२) सकाळी ११ ते दुपारी ४ या वेळेत हे शिबिर पार पडणार आहे. संबंधित झोपडीधारकांनी लाभ घ्यावा, असे आवाहन झोपडपट्टी पुनर्वसन प्राधिकरण यांनी केले आहे.