खुशबू ठाकरे मृत्यु प्रकरण

खुशबू ठाकरे मृत्यू प्रकरण
दोषींवर गुन्हे दाखल करण्यासाठी
१६ जुलै रोजी ठिय्या आंदोलन
पेण, ता. १० (वार्ताहर) : पेण तालुक्यातील एकात्मिक आदिवासी विकास प्रकल्प अंतर्गत असणाऱ्या वरवणे आदिवासी आश्रमशाळेतील विद्यार्थिनी खुशबू ठाकरे हिचा कुष्ठरोगावरील उपचारादरम्यान मृत्यू झाला. या घटनेला सहा महिने उलटून गेले, परंतु याबाबत दोषींवर अजूनही गुन्हे दाखल न झाल्याने या मागणीसाठी ग्राम संवर्धन सामाजिक संस्थेचे अध्यक्ष सामाजिक कार्यकर्ते संतोष ठाकूर यांच्या नेतृत्वाखाली १६ जुलैपासून पेण तहसीलदार कार्यालयासमोर बेमुदत ठिय्या आंदोलन करण्यात येणार आहे.
खुशबू हिला कोणताही आजार नसताना कुष्ठरोग निवारण औषधोपचारामुळे प्रकृती खालावून तिचा मृत्यू झाला आहे. त्यामुळे तिच्या मृत्यूला जबाबदार असणाऱ्या संबंधितांवर तत्काळ गुन्हे दाखल व्हावेत, अशी मागणी तिचे वडील नामदेव ठाकरे यांच्यासह सामाजिक कार्यकर्त्यांनी केली होती; मात्र दोषींवर गुन्हे दाखल झाले नसल्याने अखेर १६ जुलै रोजी पेण तहसील कार्यालय येथे ठिय्या आंदोलन करण्यात येणार असल्याचे निवेदन पेण तहसीलदार तानाजी शेजाळ व खुशबू ठाकरे प्रकरणाचे तपास अधिकारी सहाय्यक पोलिस निरिक्षक विक्रम नवरखेडे यांना देण्यात आले आहे.