व्यावसायिकाच्या घरी दागिन्यांची चोरी

व्यावसायिकाच्या घरी दागिन्यांची चोरी
अंधेरी (बातमीदार) ः घरात कोणीही नसल्याची संधी साधून अज्ञात व्यक्तीने एका व्यावसायिकाच्या घरात घुसून सुमारे साडेसात लाखांचे सोन्या-चांदीचे दागिने आणि रोकड असा मुद्देमाल चोरी करून पलायन केल्याची घटना अंधेरी परिसरात उघडकीस आली आहे.
याप्रकरणी अंधेरी पोलिसांनी घरफोडीचा गुन्हा नोंदवून पळून गेलेल्या अज्ञात व्यक्तीचा शोध सुरू केला आहे. रविवारी सकाळी उघडकीस आलेल्या घरफोडीने स्थानिक रहिवाशांमध्ये प्रचंड भीतीचे वातावरण निर्माण झाले होते. तक्रारदार व्यावसायिक असून, ते त्यांच्या कुटुंबीयांसोबत अंधेरीतील मरोळ पाइपलाइन, आनंदनगरात राहतात. त्यांचा टेक्स्टाइलचा व्यवसाय आहे. त्यांच्या बहिणीचे एक वर्षांपूर्वी लग्न झाले होते. ५ जुलैला तिची प्रसूती झाल्याने तिला जवळच्या शासकीय रुग्णालयात दाखल करण्यात आले होते. त्यामुळे त्यांच्यासह त्यांचे संपूर्ण कुटुंबीय रुग्णालयात होते. या वेळी घरात कोणीही नसल्याची संधी साधून त्यांच्या घरात अज्ञात व्यक्तीने प्रवेश केला. कपाटातील विविध सोन्याचे, चांदीचे दागिने आणि ४० हजार रुपये रोख रक्कम असा सात लाख ५६ हजार रुपयांचा मुद्देमाल चोरी करून पलायन केले होते. रविवारी सकाळी ५ वाजता ते त्यांच्या घरी आले होते. या वेळी त्यांना त्यांच्या घरी घरफोडी झाल्याचे दिसून आले. त्यानंतर त्यांनी ही माहिती अंधेरी पोलिसांना दिली होती.