दुसऱ्या फेरीसाठी नोंदणीला प्रारंभ

दुसऱ्या फेरीसाठी नोंदणीला प्रारंभ
अकरावी प्रवेश : गुणवत्ता यादी १७ जुलैला
मुंबई, ता. १० : राज्यातील कनिष्ठ महाविद्यालयातील अकरावीच्या ऑनलाइन प्रवेशाच्या पहिल्या फेरीतील प्रवेश प्रक्रिया पूर्ण झाल्यानंतर आज गुरुवारी (ता. १०) सकाळी १० वाजता दुसऱ्या प्रवेश फेरीच्या प्रवेश नोंदणीला सुरुवात झाली आहे. ही नोंदणी रविवारी (ता. १३) सायंकाळी साडेसहा वाजेपर्यंत सुरू राहणार आहे.
अकरावीच्या दुसऱ्या फेरीच्या नोंदणीच्या पहिल्याच दिवशी एक लाख १२ हजार ५६० नवीन विद्यार्थ्यांनी आपली नोंदणी सुरू केली. जुन्या विद्यार्थ्यांमध्ये १२ लाख ७१ हजार १७६ विद्यार्थ्यांचाही यात समावेश आहे. दुसऱ्या फेरीसाठी नोंदणी सुरू केलेल्यांत यात आठ हजार ११७ विद्यार्थ्यांची नोंदणी पूर्ण झाली तर यातील भाग एक हा ३७ हजार १५४ विद्यार्थ्यांनी लॉक केला तर दोन लाख १३ हजार ९७१ जणांनी कॅप ऑप्शन लॉक केला आहे.

या प्रवेशासाठी नोंदणी केलेल्या विद्यार्थ्यांची गुणवत्तेनुसार त्यांच्या प्रवेशाची गुणवत्ता यादी गुरुवारी (ता. १७) जाहीर केली जाणार असून त्यानंतर विद्यार्थ्यांना १८ ते २१ जुलैदरम्यान संबंधित महाविद्यालयांमध्ये जाऊन प्रवेश घ्यावा लागेल, अशी माहितीही संचालक डॉ. महेश पालकर यांनी दिली.
दुसऱ्या फेरीच्या नोंदणीदरम्यान विद्यार्थ्यांना नवीन नोंदणी,‍ भाग एक, भाग दोन भरता येईल, तसेच पहिल्या फेरीदरम्यान अर्ज केलेला असल्यास त्यात दुरुस्ती करण्याचे पर्यायही मिळतील. यामुळे विद्यार्थ्यांना या फेरीसाठी आपली माहिती अद्ययावत भरण्याची संधी मिळणार आहे. तसेच, महाविद्यालयांचे पसंतीक्रम आदींची माहिती भरता येईल. ती रविवारी (ता. १३) सायंकाळी साडेसहा वाजेपर्यंतच भरता येईल, असेही संचालनालयाकडून सांगण्यात आले.
----
२३ जुलैपासून तिसरी फेरी
संचालनालयाकडून बुधवारी (ता. २३) या दुसऱ्या फेरीत रिक्त राहिलेल्या जागा जाहीर करून तिसऱ्या फेरीचे नियोजन जाहीर केले जाणार असल्याची माहितीही संचालक डॉ. पालकर यांनी दिली. ज्या विद्यार्थ्यांनी अकरावीच्या प्रवेशासाठी ऑनलाइन नोंदणी केली नाही अथवा दुसऱ्या आणि त्यापुढील पसंतीक्रम मिळाल्यानंतर प्रवेश घेतलेले नाहीत, अशा सर्व विद्यार्थ्यांनी या दुसऱ्या फेरीसाठी दिलेल्या मुदतीत आपले अर्ज करावेत, असे आवाहन पालकर यांनी केले आहे.