रुग्णालयाची जागा वर्षानंतरही ओसाड

रुग्णालयाची जागा वर्षानंतरही ओसाड
भूमिपूजनासाठी राजकीय पक्षात झाली होती चढाओढ
बोळिंज, ता. १० (बातमीदार) : गेल्या वर्षी वसई-विरारमध्ये भव्यदिव्य ४०० खाटांचे शासकीय रुग्णालय बनणार, असे म्हणताच त्या रुग्णालयाच्या भूमिपूजनासाठी भाजप आणि बहुजन विकास आघाडी यांच्यामध्ये जोरदार राडा झाला होता. या गोष्टीला आता वर्ष उलटले तरीदेखील रुग्णालयासाठीची जागा ही ओस पडली आहे आणि या ठिकाणी एक साधी वीटही लावण्यात आलेली नाही. यामुळे आता नागरिक रुग्णालयाची प्रतीक्षा करीत आहेत.
वसई-विरार शहराची जनसंख्या ३० लाखांच्या पार गेलेली आहे. तरीदेखील अद्याप या ठिकाणी शासकीय रुग्णालयाची सुविधा ठप्प पडली आहे. एका बाजूला येथे बुलेट ट्रेनसारखा प्रकल्प येत आहे; परंतु या ठिकाणी एकही सुसज्ज असे अत्याधुनिक शासकीय रुग्णालय नाही. नागरिकांना काही लागल्यास मुंबईचा दोन ते चार तासांचा प्रवास करावा लागतो. यामुळे आतापर्यंत अनेक नागरिकांनी नातेवाइकांना गमावले, तसेच अनेक नागरिकांना त्रास सहन करावा लागला.
जागेचे वाद सुरू असल्याने रुग्णालय होण्यास अडथळा येत आहे, असे सतत उत्तर सत्ताधाऱ्यांकडून येत आहे; परंतु यावर कोणताही तोडगा काढण्याचा प्रयत्न प्रशासनाकडून होताना दिसत नाही. त्यामुळे रुग्णालयाची प्रतीक्षा करीत नागरिक हैराण झालेले आहेत. माजी आमदार क्षितिज ठाकूर तसेच वर्तमान आमदार राजन नाईक या दोन्ही आमदारांकडून हॉस्पिटलसाठीचे प्रयत्न शून्य असल्याने आरोग्याचा प्रश्न पुन्हा एकदा ऐरणीवर आला.

लोकप्रतिनिधी निरुत्साही
गेल्या वर्षी विधान परिषद निवडणुकीनंतर आमदार क्षितिज ठाकूर यांना वाढदिवसानिमित्त सरकारने शासकीय रुग्णालयाची मंजुरी देत २५० कोटी रुपये मंजूर केले असून त्याचे भूमिपूजन ठेवण्याचे जाहीर केले. यानंतर त्वरितच काहीच वेळेत भाजपने खासदार डॉ. हेमंत सावरा यांच्या हस्ते भूमिपूजन करीत असल्याचे बॅनर लावले. तसेच भूमिपूजन दिवशी दोन्ही पक्षांमध्ये राडा झाला आणि भूमिपूजन करण्यावरून मोठा गदारोळ पाहायला मिळाला. तसेच दोन्ही पक्षांतील पदाधिकाऱ्यांची हाणामारीदेखील झाली. आरोग्यसेवा वसई-विरारमध्ये शून्य आहे, अशी नावे ठेवणारे आमदारदेखील यासाठी कोणतेच प्रयत्न करताना दिसत नाहीत.