वसईत कचऱ्याच्या ढिगाऱ्यात सापडली नवजात बालिका

वसईत कचऱ्याच्या ढिगाऱ्यात नवजात बालिका
बोळिंज, ता. १० (बातमीदार) : वसई पश्चिमेच्या कळंब खाडीजवळ कचऱ्याच्या ढिगाऱ्यात गुरुवारी (ता. १०) नवजात बालिकेला प्लॅस्टिक पिशवीत भरून टाकून दिल्याचा प्रकार समोर आला आहे. या बालिकेला पोलिसांनी पालिकेच्या विरारच्या बोळिंज रुग्णालयात उपचारासाठी ठेवण्यात आले असून बालिका सुखरूप स्थितीत आहे.
येथील कळंब गावात जाणाऱ्या खाडीपुलाजवळ रस्त्यालगत दुपारी दोन वाजण्याच्या सुमारास एक व्यक्ती लघुशंका करण्यासाठी गेली होती. याचदरम्यान त्याला कचऱ्याच्या ढिगाऱ्यात ठेवलेल्या प्लॅस्टिक पिशवीत नवजात बालिका रडत असल्याचे दिसून आले. त्या व्यक्तीने तातडीने पोलिसांच्या ११२ क्रमांकावर दूरध्वनी करून या घटनेची माहिती दिली.
माहिती मिळताच पोलिस घटनास्थळी पोहोचून नवजात बालिकेला ताब्यात घेतले व वसई-विरार महापालिकेच्या बोळिंज येथील रुग्णालयात उपचारासाठी दाखल करण्यात आले आहे. सापडलेली बालिका एक ते दीड महिन्यांची असून ते सुखरूप आहे, अशी माहिती पोलिसांनी दिली. या प्रकाराचा तपास सुरू केला असून या बालिकेच्या आई-वडिलांचा शोध सुरू असल्याचे पोलिसांनी सांगितले आहे.