निवासी भूखंडांचे कब्जेहक्कामध्ये (फ्रीहोल्ड) रुपांतर करता येणार

भाडेपट्ट्यावरील निवासी भूखंड कब्जेहक्कामध्ये रूपांतरित होणार
सिडकोतर्फे योजनेच्या अंमलबजावणीसाठी समितीची स्थापना
सकाळ वृत्तसेवा
नवी मुंबई, ता. १० : सिडकोतर्फे रहिवासी प्रयोजनार्थ भाडेपट्ट्यावर (लिजहोल्ड) वाटप केलेल्या जमिनी कब्जेहक्कामध्ये (फ्रीहोल्ड) रूपांतरित करण्याबाबत महाराष्ट्र शासनाने निर्णय घेतला आहे. या निर्देशानुसार प्रामुख्याने निवासी भूखंडांचे फ्रीहोल्डमध्ये रूपांतर करण्यासाठी येणाऱ्या अर्जांची छाननी करण्याकरिता सिडकोतर्फे समिती गठित करण्यात आली आहे. ही योजना निविदा प्रक्रियेने, सिडकोमार्फत बांधण्यात आलेले गृहप्रकल्प तथा १२.५ टक्के व २२.५ टक्के योजनेंतर्गत वाटप करण्यात आलेल्या निवासी भूखंडांकरिता लागू राहील. त्याअनुषंगाने सर्व निवासी मालमत्ता भूधारकांनी अर्ज केल्यावर निश्चित केलेले रूपांतर शुल्क भरल्यानंतर कब्जेहक्कामध्ये रूपांतरित करता येईल.
ज्या भूखंडाच्या करारनाम्यामध्ये अनर्जित उत्पन्नाचा भरणा करण्याबाबत उल्लेख आहे, अशा भूखंडांना निश्चित केलेले रूपांतर शुल्कासह विहित अनर्जित रकमेचा भरणा करावा लागेल. अनुदानित/सवलतीच्या दराने वाटप केलेल्या भूखंडांचे निश्चित केलेल्या रूपांतर शुल्काव्यतिरिक्त इतर निश्चित केलेले शुल्क वसूल करून कब्जेहक्कामध्ये रूपांतरित करण्यात येईल.

कब्जेहक्कानंतर हस्तांतरण शुल्क माफ
ही योजना ऐच्छिक असून भाडेपट्टाविलेख (लिजडीड) झालेल्या भूखंडांनाच लागू राहील. भूखंडाचे कब्जेहक्कामध्ये रूपांतर झाल्यानंतर मालमत्तेच्या विक्री अथवा हस्तांतरणाकरिता सिडकोतर्फे हस्तांतरण शुल्क आकारले जाणार नाही. कब्जेहक्कामध्ये रूपांतर झालेल्या भूखंडाच्या अधिकार अभिलेखाची नोंद व अद्ययावतीकरण भूमी अभिलेख विभाग, महाराष्ट्र शासन यांच्या तर्फे करण्यात येईल.