रक्त संकलन ५०० युनिटच्या वर नको

रक्त संकलन ५०० युनिटच्या वर नको
रक्तदान शिबिरापूर्वी परवानगी आवश्यक
सकाळ वृत्तसेवा
मुंबई, ता. ११ : अतिरिक्त रक्त संकलनामुळे रक्त मुदतबाह्य होऊन वाया जाते. यासाठी बल्क ट्रान्स्फरमध्ये होणाऱ्या गैरप्रकाराबाबत तक्रारी टाळण्यासाठी मेगा रक्तदान शिबिरे आयोजित करण्याचे टाळावे. सर्व रक्त केंद्रप्रमुखांना एका शिबिरात जास्तीत जास्त ५०० युनिटच्या वर रक्त संकलन करू नये, अशा सूचना सार्वजनिक आरोग्यमंत्र्यांनी दिल्या आहेत.
नुकतीच राज्य रक्तसंक्रमण परिषदेची आढावा बैठक सार्वजनिक आरोग्य व कुटुंबकल्याण मंत्र्यांच्या मार्गदर्शनाखाली पार पडली. त्या वेळेस काेणत्याही रक्तदान शिबिरापूर्वी जिल्हा रक्तसंक्रमण अधिकाऱ्यांची ऑनलाइन पद्धतीने तीन दिवसांत परवानगी घेणे आवश्यक आहे. अशी परवानगी न मिळाल्यास मानीव परवानगी गृहीत धरावी, अशा सूचना विभागातर्फे देण्यात आल्या आहेत. या सूचनांचे परिपत्रक काढण्यात आले. काही ठिकाणी रक्तदान शिबिरामध्ये रक्तदात्यांना आमिषे दाखवून महागड्या वस्तू भेट म्हणून देण्यात येतात. हा प्रकार अनुचित असून औषधे व सौंदर्यप्रसाधने अधिनियम १९४५ नियम क्र. ११२ईए (जी)चे उल्लंघन करणारा आहे. यावर कडक निर्बंध टाकण्यात यावे. रक्तकेंद्रामध्ये सूचनापेटी- तक्रारपेटी ठेवण्यात यावी. पुढच्या १५ दिवसांत या सूचनांचे पालन करून केलेल्या कार्यवाहीचा अनुपालन अहवाल राज्य रक्तसंक्रमण परिषदेस द्यायचा आहे, असे राज्य रक्तसंक्रमण परिषदेचे सहसंचालक डॉ. पुरुषोत्तम पुरी यांनी सांगितले.