जव्हारमध्ये बेकायदा दारूसह १३.६९ लाख किमतीचा मुद्देमाल हस्तगत

जव्हारमध्ये बेकायदा दारूसह मुद्देमाल हस्तगत
जव्हार, ता. ११ (बातमीदार) : येथील राजीव गांधी स्टेडियमजवळ एका इनोव्हा क्रिस्टा कारमधून बेकायदा दारू वाहतूक होत असल्याची माहिती जव्हार पोलिसांना मिळाली. त्यानुसार पोलिसांनी नुकताच सापळा रचत बेकायदा दारूसह १३.६९ लाख रुपये किमतीचा मुद्देमाल हस्तगत केला.
सिल्वासा येथून दारूने भरलेली दमण बनावटीची इनोव्हा कार येत असल्याची माहिती मिळताच पोलिसांनी सेलवास नाका येथे सापळा रचला व बॅरिकेड्स लावले. इनोव्हा वाहनचालकाने पोलिस बंदोबस्त पाहून तेथून पळ काढला. दरम्यान, चालकाला गाडीचे चाक पंक्चर झाल्याचे लक्षात येताच त्याने राजीव गांधी स्टेडियम येथे गाडी तशीच सोडली आणि फरार झाला. पोलिसांनी पाठलाग करीत राजीव गांधी स्टेडियम येथे या थांबलेल्या गाडीची पाहणी केली. त्या वेळी टोयाटो कंपनीची इनोव्हा क्रिस्टा गाडीमध्ये दमण बनावटीच्या विविध प्रकारच्या विदेशी दारूचे ५१ बॉक्स आढळून आले. तपासाअंती गाडी आणि विदेशी दारू असा १३ लाख ६९ हजार ६८० रुपये किमतीचा मुद्देमाल हस्तगत करण्यात आला.