मुरूडमधून साडेतेरा लाखांचे चरस जप्त

मुरूडमधून साडेतेरा लाखांचे चरस जप्त
१३ आरोपींना अटक; स्थानिकांचाही समावेश
अलिबाग, ता. ११ (वार्ताहर) : मुरूडमध्ये सक्रिय असणाऱ्या चरस विक्रेत्यांचे रॅकेट रायगड पोलिसांनी उद्ध्वस्त केले आहे. या रॅकेटमधील एकूण १३ आरोपींना पोलिसांनी ताब्यात घेत १३ लाख ६१ हजार रुपयांचे चरस जप्त केले आहे. याबाबतची माहिती जिल्हा पोलिस अधीक्षक आँचल दलाल यांनी शुक्रवारी (ता. ११) पत्रकार परिषदेत दिली.
मुरूडमध्ये २९ जून रोजी नाकाबंदीदरम्‍यान सुरू असताना शिघेर चेक पोस्ट येथे आरोपी अलवान निसार दफेदार (वय १९, मुरूड) आणि राजू खोपटकर (रा. गावदेवी पाखाडी मुरूड) दुचाकीवरून जात असताना पोलिसांना पाहून राजू खोपटकर पळून गेला. त्यामुळे पोलिसांनी दफेदारला अडवून दुचाकी तपासली असता तिच्या डिकीमध्ये ७७८ ग्रॅम चरस पोलिसांना आढळले. पोलिसांनी त्याला ताब्यात घेत चौकशी केली असता, त्याने चरस विक्री करीत असल्याचे सांगून त्याच्या साथीदारांची नावेही सांगितली. त्यामध्ये मुख्य डिलर विशाल रामकिशन जैसवाल (२७, उत्तर प्रदेश) आणि अनुप राजेश जैसवाल (रा. मुरूड गावदेवी पाखाडी), अनुज विनोद जैसवाल (१९, मुरूड) यांच्या मदतीने आरोपी आशीष अविनाश डिगे (२५, मुरूड), प्रणित पांडुरंग शिगवण (२५, मुरूड), आनस इम्तियाज कबले (२०, मुरूड), वेदांत विलास पाटील (१८, मुरूड), साहिल दिलदार नाडकर (२७, रोहा), अनिल बंडु पाटील (४०, कल्याण), सुनील बुधाजी शेलार (३४, ठाणे), राजू खोपटकर (रा. मुरूड), खुबी माखनसिंग भगेल (रा. मुरूड) बेकायदा व्यवसाय करीत होते.
विशाल जैसवाल हा नेपाळ, उत्तर प्रदेश येथून चरस आणत होता, तर त्याचे साथीदार आरोपी अनुप जैसवाल व अनुज जैसवाल यांच्यामार्फत आरोपी आशीष डिगे व प्रणित शिगवण इतर आरोपींच्या मदतीने विकत होते. अनुप जैसवाल व त्याच्या साथीदारांकडून पोलिसांनी १३ लाख ६१ हजार रुपये किमतीचा एकूण दोन किलो ६.५९ ग्रॅम चरस हस्तगत केला आहे. त्याचप्रमाणे जप्त करण्यात आलेली स्कुटी ही चोरीची असल्याचे निष्पन्नही झाले.
दरम्‍यान, ज्यांच्या अधिकारक्षेत्रात हा गुन्हा घडला आहे, त्या अधिकाऱ्यांविरोधात शिस्तभंगाची कारवाई करण्यात येणार असल्याचे जिल्हा पोलिस अधीक्षक आँचल दलाल यांनी सांगितले आहे.