धावत्या एक्सप्रेसमध्ये तरुणीवर अत्याचार

धावत्या एक्स्प्रेसमध्ये तरुणीवर अत्याचार
आरोपीला अकोला येथून अटक
सकाळ वृत्तसेवा
डोंबिवली, ता. ११ ः डोंबिवली येथील १६ वर्षीय अल्पवयीन मुलीला फूस लावून एक्स्प्रेस गाडीने अकोला येथे घेऊन जाताना रेल्वे प्रवासादरम्यान तिच्यावर लैंगिक अत्याचार केले. याप्रकरणी रेल्वे पोलिसांनी गजानन चव्हाण (वय २६) याला त्याच्या अकोला येथील राहत्या घरातून अटक करून कल्याणमध्ये आणले. कल्याण रेल्वे न्यायालयाने शुक्रवारी (ता. ११) त्याला १५ जुलैपर्यंत पोलिस कोठडी सुनावली आहे.
आरोपी गजाननने मुलीला कल्याणमधून फूस लावून पळवून नेले होते. कसारा ते अकोलादरम्यान रेल्वे प्रवासात त्याने तिच्यावर एक्स्प्रेसमध्ये लैंगिक अत्याचार केल्याचे पोलिस तपासात उघड झाले. तांत्रिक तपासाच्या आधारे कल्याण रेल्वे पोलिसांनी गजानन याचा शोध घेत राहत्या घरी अकोला येथील शेखापूर तालुक्यातून त्याला बेड्या ठोकल्या.
डोंबिवली परिसरातील एका अल्पवयीन मुलीशी एका तरुणाने जवळीक साधून अकोल्याला घेऊन जाताना रेल्वे प्रवासात तिच्यावर अतिप्रसंग केला. अकोला येथे घरच्यांनी मुलीला घरात घेण्यास नकार देताच तरुणाने तिला अकोला स्टेशनला सोडून गेल्याची घटना २९ जूनला घडली. याप्रकरणी अकोला लोहमार्ग पोलिस ठाण्यात गुन्हा दाखल करण्यात आला होता. अकोला पोलिसांनी कल्याण लोहमार्ग पोलिस ठाण्यात गुन्हा वर्ग केला होता.