माहुलमध्ये पालिकेने बांधलेल्या १३ हजार घरांचे करायचे काय?

माहुलमधील १३ हजार घरांचे काय?
पालिकेची आता निवृत्त कर्मचाऱ्यांना हाक
सकाळ वृत्तसेवा
मुंबई, ता. ११ : माहुल येथील पालिकेने बांधलेल्या १३ हजार घरांना प्रतिसाद कमी मिळत असल्याने या घरांचे करायचे काय, असा प्रश्न पालिकेपुढे निर्माण झाला आहे. या घरांची विक्री होत नसल्याने आता पालिकेने काही निकषात बदल करत पालिकेच्या निवृत्त कर्मचाऱ्यांना या घरांची विक्री करण्याचा निर्णय घेतला आहे.

माहुलमधील प्रदूषणांमुळे या सदनिकांमध्ये प्रकल्पबाधित राहायला जात नाहीत. येथील असुविधांमुळे या ठिकाणी पालिकेने बांधलेली तब्बल १३ हजारांहून अधिक घरे धूळखात आहेत. ही घरे पालिका कर्मचाऱ्यांना १२ लाख ६० हजार रुपये किमतीत विकली जात आहेत, मात्र त्यालाही कामगारांचा प्रतिसाद मिळत नसल्याचे दिसून आले. गेल्या १५ मार्चपासून एकूण ९,०९८ घरांसाठी अर्ज भरण्यास सुरुवात झाली, तर १५ एप्रिलपर्यंत मुदत देण्यात आली होती. या कालावधीत फक्त २३१ अर्ज आले. अल्प प्रतिसादामुळे १५ मेपर्यंत मुदत वाढवण्यात आली. शिवाय निकषातही शिथिलता देण्यात आली, मात्र दोन महिन्यांनंतरही  फक्त ३३० अर्ज आले. यानंतर २१ जूनला या घरांचे वाटप केले जाणार होते, मात्र ३३० पैकी सुमारे ५० कर्मचाऱ्यांनीच घरासाठी रक्कम जमा केली. त्यामुळे पुन्हा ३० जुलैपर्यंत मुदत वाढवली, मात्र २४८ अर्जदारांनी ३३० घरांसाठी नोंदणी केली. यात एका अर्जदाराने दोन घरांसाठी अर्ज केले. त्यामुळे ३३० घरांची विक्री केली जाणार होती. घराचे वाटप करण्यासाठी ३० जून ही अनामत रक्कम भरण्याची अंतिम मुदत होती, मात्र २४८ अर्जदारांपैकी फक्त ५३ अर्जदारांनीच घराची अनामत रक्कम भरली. त्यामुळे उर्वरित १९५ अर्जदारांनी ही घरे नाकारली आहेत. ज्या ५३ अर्जदारांनी ७२ घरांची अनामत रक्कम भरली आहे, त्यांनाच घरांचे वाटप केले जाणार आहे.

निवृत्त पालिका कर्मचाऱ्यांना हाक
मुदत वाढवूनही माहुल येथील पालिकेच्या घरांना प्रतिसाद मिळालेला नाही. निम्म्यापेक्षा अधिक अर्जदारांनी ही घरे नाकारली. त्यामुळे आता पालिकेच्या संबंधित विभागाने निकषात बदल करून पालिकेच्या निवृत्त कर्मचाऱ्यांना घर खरेदीची हाक दिली आहे. या घरांसाठी अधिक अर्ज करता येईल, असा प्रस्ताव पालिकेने तयार केला असल्याची माहिती पालिकेच्या सूत्रांनी दिली.