शिक्षणाधिकारी संदीप संगवे निलंबित

शिक्षणाधिकारी संदीप संगवे निलंबित
शालेय आयडी घोटाळ्याची एसआयटी चौकशी
सकाळ वृत्तसेवा
मुंबई, ता. ११ : महापालिकेच्या शिक्षण विभागातील शालेय आयडी घोटाळ्याचे पडसाद विधानसभेत उमटले असून याप्रकरणी शिक्षणमंत्री दादा भुसे यांनी मुंबई महापालिकेचे शिक्षणाधिकारी संदीप संगवे यांना निलंबित करण्याची घोषणा केली आहे. तसेच, या प्रकरणाची विशेष तपास पथकामार्फत (एसआयटी)मार्फत चौकशी केली जाईल, असे त्यांनी जाहीर केले आहे.

भाजपचे आमदार संजय उपाध्याय यांनी विधानसभेत हा मुद्दा उपस्थित केला. त्यांनी सांगितले, की संदीप संगवे यांनी विभागीय शिक्षण उपसंचालक असताना शालेय आयडी वाटपात मोठ्या प्रमाणावर गैरव्यवहार केला. यामध्ये शैक्षणिक पात्रता नसतानाही शालेय आयडी देणे, आर्थिक व्यवहार करून आयडी मंजूर करणे, कनिष्ठ महाविद्यालयांमध्ये वाढीव पदांची बेकायदा मान्यता, बोगस शाळांना मान्यता, ऑनलाइन प्रवेश प्रक्रियेत हस्तक्षेप, मागील तारखांनी मान्यता देणे, कोविड काळात भरती प्रक्रिया बंद असताना बँक डेटेड मंजुरी देणे, रात्रशाळेत नियुक्त्या करणे, अशा तब्बल २० हून अधिक गंभीर आरोपांचा समावेश आहे. उपाध्याय यांनी आरोपांचे काही ठोस पुरावेही सभागृहात सादर केले. न्यायालयानेही याच अधिकाऱ्यावर शालेय आयडी प्रकरणात दिरंगाई केल्याबद्दल तीन लाख ३० हजार रुपयांचा दंड ठोठावला होता, तरीही ते पदावर कायम होते. एवढेच नव्हे, तर गेली १३ वर्षे ते मुंबईतच एका विभागात कार्यरत असल्याची बाबही त्यांनी सभागृहाच्या निदर्शनास आणली.

सदस्यांचा संताप
शालेय आयडी घोटाळ्यावर भाजपचे आमदार रणधीर सावरकर, मिहीर कोटेचा, प्रवीण दटके, प्रताप अडसड, गोपीचंद पडळकर यांच्यासह इतर सदस्यांनीही तीव्र संताप व्यक्त केला. या सदस्यांनी अशा अधिकाऱ्यांचे त्वरित निलंबन करावे आणि एसआयटी चौकशी व्हावी, अशी मागणी केली. शिक्षणमंत्री दादा भुसे यांनी सुरुवातीला चौकशी करून कारवाई करण्याचे आश्वासन दिले; मात्र सभागृहातील सदस्यांच्या तीव्र भावना लक्षात घेऊन संदीप संगवे यांचे त्वरित निलंबन जाहीर करण्यात आले आणि एसआयटी चौकशीची घोषणा करण्यात आली.