अभुदय नगर पुनर्विकासासाठी अंतिम निविदा भरण्यासाठी रविवारी अंतिम मुदत

अभ्युदयनगरचा पुनर्विकास
रविवारी निविदांची अंतिम मुदत
सकाळ वृत्तसेवा
मुंबई, ता. ११ : मुंबईतील अभ्युदयनगर येथील म्हाडा वसाहतींचा पुनर्विकास म्हाडाच्या माध्यमातून बांधकाम आणि विकास एजन्सीद्वारे केला जाणार आहे. त्यानुसार विकसकाची नियुक्ती करण्यासाठी म्हाडाने निविदा मागवल्या आहेत. निविदा भरण्याची अंतिम मुदत रविवार (ता. १३)पर्यंत असून यामुळे तिसऱ्या मुदतवाढीत तरी विकसक येण्याचे वेध म्हाडा अधिकाऱ्यांसह रहिवाशांना लागले आहेत.
अभ्युदयनगर येथील म्हाडाच्या वसाहतीच्या पुनर्विकासाची प्रक्रिया सुरू आहे. त्यानुसार सुरुवातीला पुनर्वसन सदनिकेचे चटई क्षेत्रफळ किमान ६३५ चौरस फूट असावे, अशी अट ठेवली होती. त्याला दोनदा मुदतवाढ दिल्यानंतरही एकाही विकसकाने निविदा भरल्या नव्हत्या. त्यामुळे राज्य सरकारच्या मंजुरीने म्हाडाने पुनर्वसन सदनिकेचे क्षेत्रफळ ६३५ वरून ६२० पर्यंत कमी करीत बांधकाम आणि विकास एजन्सीच्या नियुक्तीसाठी निविदा मागवल्या होत्या. या निविदा भरण्यासाठी म्हाडा कार्यलयात नुकत्याच झालेल्या निविदापूर्व तांत्रिक बैठकीला कल्पतरू, रुस्तमजी आणि महिंद्रा लाइफ स्पेस या विकसक कंपन्यांनी हजेरी लावली होती. त्यामुळे प्रत्यक्षात किती विकसक येणार, याबाबत सर्वांचे लक्ष लागले असल्याची माहिती म्हाडाच्या एका वरिष्ठ अधिकाऱ्याने दिली.