बेस्ट बसची ट्रकला धडक; सहा जखमी

बेस्ट बसची ट्रकला
धडक; सहा जखमी
सकाळ वृत्तसेवा
मुंबई, ता. ११ : बेस्ट उपक्रमाच्या दिंडोशीहून शिवडी बसस्थानकाकडे जाणाऱ्या बसने आज सकाळी साडेसहा वाजता ट्रकला वनराई पोलिस ठाण्याजवळ जोरात धडक दिली. यात बसचे मोठे नुकसान झाले असून, बसचालकासह सहा प्रवासी जखमी झाले आहेत.
अपघातग्रस्त बस ही वडाळा आगाराची असून, मातेश्वरी कंपनीची भाडेतत्त्वावर चालवण्यात येत होती. अशरफ साहिद हुसेन (वय ६६), सीताराम गायकवाड (६०), भारती मांडवकर ( ५६), सुधाकर रेवाळे (५७), पोचिया नरेश कानपोची (३०), अमित यादव (३५) अशी जखमी प्रवाशांची नावे आहेत.
गोरेगाव पूर्व-पश्चिम द्रुतगती मार्गावर वनराई पोलिस ठाण्यासमोर सेवा रस्त्यावर अचानक खासगी कार समोर आल्याने चालकाने ब्रेक मारताच बसवरील नियंत्रण सुटले आणि ती ट्रकला धडकली.
बसवाहकाने जखमींना बोरिवलीतील ट्रॉमा केअर रुग्णालयात नेले. याप्रकरणी बेस्टचे अधिकारी चौकशी करीत आहेत. बसचालकाला पोलिसांनी ताब्यात घेतले असून, जखमींची प्रकृती स्थिर असल्याचे बेस्टच्या सूत्रांनी सांगितले.
--------------