मुंबई-पुणे रेल्वे वाहतूक ठप्प

मुंबई-पुणे रेल्वे वाहतूक ठप्प
खंडाळा घाटात मालगाडी रुळावरून घसरली
कर्जत, ता. ११ (बातमीदार) : मुंबई-पुणे रेल्वे मार्गावर आज दुपारच्या सुमारास एका मालगाडीचा अपघात झाल्याची घटना घडली आहे. ही मालगाडी खंडाळा घाटातून पुण्याकडे जात असताना मंकी हिलजवळ रूळावरून घसरली. या अपघातामुळे मुंबई-पुणे रेल्वे मार्गावरील वाहतूक पूर्णतः ठप्प झाली आहे.
या घटनेमुळे घाटात कोणार्क एक्स्प्रेस, हैदराबाद एक्स्प्रेस आणि वंदे भारत एक्स्प्रेससारख्या प्रमुख गाड्या थांबवण्यात आल्या आहेत, तर कर्जत स्थानकात असलेल्या जोधपूर-हडपसर सुपरफास्ट एक्स्प्रेसमधील प्रवाशांना रेल्वे प्रशासनाकडून पर्यायी प्रवासाची सूचना देण्यात आली आहे. प्रवाशांनी कर्जत-खोपोली लोकलने खोपोलीपर्यंत जावे आणि त्यानंतर रस्त्याने पुढील प्रवास करावा, अशा सूचना स्थानकात करण्यात येत आहेत. अपघात घडताच लोणावळ्याहून अपघात निवारण गाडी तातडीने घटनास्थळी रवाना झाली आहे. दरम्यान, मालगाडी हटविण्याचे काम युद्धपातळीवर सुरू असून, नेमका किती वेळ लागेल, याबाबत अजूनही अधिकृत माहिती देण्यात आलेली नाही. या घटनेमुळे पनवेल-नांदेड एक्स्प्रेस, प्रगती एक्स्प्रेस, डेक्कन क्वीन एक्स्प्रेससारख्या गाड्यांचे वेळापत्रक कोलमडले असून, या गाड्या उशिराने मुंबईहून सुटणार असल्याची माहिती मिळाली आहे. या अपघातात सुदैवाने कोणतीही जीवितहानी झालेली नाही, मात्र प्रवाशांचे हाल सुरू असून, रेल्वे प्रशासनाकडून परिस्थिती पूर्वपदावर आणण्याचे शर्थीचे प्रयत्न सुरू आहेत.