क्रॉफर्ड मार्केटच्या मासळी मार्केटचा प्रश्न चिघळणार

क्रॉफर्ड मार्केटमधील मासळी मार्केटचा प्रश्न चिघळणार
कोळीबांधव उद्या करणार आंदोलन
सकाळ वृत्तसेवा
मुंबई, ता. १२ ः क्रॉफर्ड मार्केट येथील मासळी मंडईचा प्रश्न चिघळण्याची दाट शक्यता आहे. मुंबई महापालिकेच्या विरोधात कोळीबांधवांनी आक्रमक भूमिका घेतली आहे. येत्या सोमवारी (ता. १४) आंदोलनाची घोषणा करण्यात येणार असल्याची माहिती अखिल महाराष्ट्र मच्छीमार कृषी समितीचे अध्यक्ष देवेंद्र दामोदर तांडेल यांनी दिली आहे.
क्रॉफर्ड मंडई येथील मासळी मार्केटमध्ये सन १९७१ कोळी महिला मासळी विक्रीचा व्यवसाय करतात. छत्रपती शिवाजी महाराज मासळी मंडईवर मुंबई महानगरपालिकेकडून होऊ घातलेल्या फसवणुकीच्या विरोधात भूमिका कोळी समाज आक्रमक झाला आहे. मच्छीमारांसाठी वेगळी मासळी मंडईची इमारत उभी करण्याचे आश्वासन पालिकेकडून २०२० साली देण्यात आले होते. त्याला मच्छीमारांनी मान्य केले होते; परंतु पुढे मच्छीमारांसोबत कोणताही संवाद व अभिप्राय न घेता घाऊक मासळी व्यावसायिकांना तळ मजल्यामध्ये स्थलांतर केल्याने कोळी समाजाने २०२० मध्येच विरोध केला होता.
कोळी समाजाने जेव्हा हा भूखंड ४०० कोटी रुपये उभे करून भाडेकरावर घेण्याचा प्रस्ताव पालिकेला दिल्यानंतर पालिकेने दिशाभूल करणारे स्पष्टीकरण दिले, मुंबई महापालिकेकडून मच्छीमारांना विश्वासात घेण्यात आले नाही, असे तांडेल यांनी सांगितले.