अखेर कैलास तनवाणीला अटक

अखेर कैलास तनवाणीला अटक
अंबरनाथ, ता. ११ (वार्ताहर) : एका अल्पवयीन मुलाला सोसायटीतील कैलास तनवाणी या रहिवाशाने ४ जुलै रोजी लिफ्टमध्ये मारहाण केल्याची घटना घडली होती. घटनेनंतर तनवाणी फरार झाला होता. अखेर घटनेच्या दोन दिवसांनी शिवाजीनगर पोलिसांनी त्याला अटक केली आहे.
अंबरनाथ पूर्वच्या पालेगाव परिसरातील पटेल जियम सोसायटीत ४ जुलै रोजी ही घटना घडली होती. या सोसायटीत राहणारा एक अल्पवयीन मुलगा सायंकाळी क्लासला जात असताना लिफ्टमध्ये कैलास तनवाणी आला आणि त्याने तू मोहित का दोस्त है ना? अशी विचारणा करत थेट या मुलाला मारहाण करण्यास सुरुवात केली. या लहानग्याच्या तब्बल पाच कानशिलात लगावत त्याने प्रतिकार करण्यासाठी हात मध्ये आणला असता या विकृताने त्याच्या हाताचा चावा घेतला. हा सगळा प्रकार लिफ्टच्या सीसीटीव्ही कॅमेरात कैद झाला होता. याप्रकरणी शिवाजीनगर पोलिस ठाण्यात गुन्हा दाखल झाला होता.